Ўзбекистон: Қўшиқ айтиш учун лицензия керакми?
Сурат манбаси, jahongir otajonov
Ўзбекистонда айрим санъаткорларнинг лицензиясидан маҳрум этилиши охирги кунларда ижтимоий тармоқларда энг кўп муҳокама қилинган мавзу бўлди.
16 октябр куни "Ўзбекконцерт" давлат муассасаси Жаҳонгир Отажонов, Абдулла Қурбонов, Шаҳло Аҳмедова ва Ҳалима Ибрагимовага "ижодий фаолиятини давом эттириш учун рухсат берилгани" ҳақида хабар тарқатди.
Бундан икки кун олдин таниқли хонанда Жаҳонгир Отажоновни "Ўзбекконцерт" "маънавий қадриятларимизга мутлақо ёт бўлган номуносиб ҳаракатлари" учун деб лицензиясидан маҳрум этганини эълон қилган эди.
Кўпчилик лицензиядан маҳрум этишда келтирилган важлар, келтирилган асослар қанчалар мужмал бўлса, лицензияларни қайтариб беришдаги асослар ҳам шунчалар мужмал бўлганини урғулади.
Бугун кимдир ўзи ёқтирган санъаткорининг қўшиғини тинглаши учун лицензияга муҳтож эмаслиги ҳақидаги фикрларни ҳам эшитиш мумкин.
Хўш, қўшиқ айтиш учун лицензия керакми?
Би-би-си Ўзбекнинг навбатдаги YouTube LIVE дастури ушбу мавзуга бағишланди.
Дастурни Паҳлавон Содиқ олиб борди.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Жонли дастурда таниқли санъаткор Сарвара, Oxus Culture жамияти раҳбари Ҳусниддин Ато иштирок этишди.
Бугунги кунда Туркияда ижодий фаолият юритаётган Сарваранинг айтишича, Туркияда санъаткорларга лицензия бериш, уларни назорат қилиб туриш билан шуғулланадиган ташкилот йўқ.
- Бунинг яхши ва ёмон томонларини Ўзбекистонда бўлганимда кузатолмаслигим мумкин эди. "Ўзбекконцерт"нинг бир яхши тарафи - биз санъаткорлар контрол остида бўламиз, ўзимиз хоҳлаганимизча инсонлар маънавиятига, маърифатига зарар етказадиган ҳаракатлар қилишга ҳаққимиз йўқ. Туркияда яшаётган хонанда сифатида шуни айтишим мумкинки, телеэкранга чиқаётган ярим яланғоч хонандалар бизда мумкин эмас, - деди у.
Хонанда Сарваранинг фикрича, аҳолисининг аксарини мусулмонлар ташкил қиладиган мамлакатда санъаткорларнинг одоб-ахлоқи, кийинишини назорат қилингани маъқул.
Ўзбек мумтоз мусиқасини дунёда тарғиб этиб келаётган Oxus Culture жамияти раҳбари Ҳусниддин Атонинг айтишича, "Ўзбекконцерт" масъуллари келтираётган важлар нисбий ва хоҳлаган вақтда хоҳлаган санъаткорни "сен маънавиятсизлик қилдинг, маданиятсизлик қилдинг" деб лицензиясидан маҳрум қилиш мумкин.
- Агар ҳақиқатан лицензияни олиб қўйиш керак бўладиган бўлса, санъаткорни тартибга чақириш керак бўладиган бўлса, бизда, мисол учун, Маънавият маркази бор, партиялар бор, агар исботлай олсак унинг(санъаткорнинг) маънавиятсиз, маданиятсизлигини, қайсидир ҳужжатга таяниб, агар таяниладиган бўлса, уни суд қилишимиз мумкин. Лекин биз уни ижоддан тўхтатаяпмиз, биз уни ижро қилишдан, соз чалишдан ёки қўшиқ куйлашдан чеклаяпмиз. Биз унинг қўшиқ куйлаш, ижод қилиш ҳуқуқини чеклаяпмиз, - дейди Ҳусниддин Ато.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
