Жаноб Морел Оврўпо Иттифоқи Марказий Осиё билан алоқаларни янада ривожлантириш истагида эканини билдирган

Оврўпо Иттифоқининг Марказий Осиё бўйича махсус вакили Пьер Морел Тошкентда Ўзбекистон Президенти Ислом Каримов билан учрашган.

Оврўпо Иттифоқининг юқори лавозимли мулозимини Ислом Каримов президентлик қасамёдини келтирганидан бир кун ўтиб қабул қилган.

Давлат матбуотига кўра, Президент Ислом Каримов Пьер Морелга Оврўпо Иттифоқи ва Ўзбекистон ўртасидаги муносабатларга қўшган ҳиссаси учун қадрлашини айтган.

Жаноб Морел Оврўпо Иттифоқи Марказий Осиё билан алоқаларни янада ривожлантириш истагида эканини билдирган.

Ўзбекистон ва Оврўпо Иттифоқи ўртасидаги муносабатлар 2005 йил Андижон хунрезлигидан кейин ўта совуқлашиб кетганди.

Андижон хунрезлигига доир халқаро текширув ўтказилиши талаби билан Оврўпо Иттифоқи Ўзбекистонга жазо чораларини жорий этган эди.

Ўзбекистон ҳукумати халқаро текширув талабини рад этар экан, 2005 йилнинг кузида қатор юқори лавозимли мулозимлар учун Оврўпо Иттифоқи ўз эшикларини беркитган эди.

Тошкент билан қурол-яроғ савдосига ҳам тақиқ ўрнатилганди.

Ўтган йил кузида эса жазо чоралари нисбатан енгиллаштирилган эди.

Оврўпо Иттифоқи Ўзбекистонга нисбатан жазо чораларининг тақдири мамлакатдаги президентлик сайловининг қандай ўтишига ҳам боғлиқлигини урғулаган эди.