Оврўпо Иттифоқининг кейинги қарори Ўзбекистондаги президентлик сайловларига баҳога ҳам боғлиқ бўлиши айтилди

Оврўпо Иттифоқи Андижон воқеалари учун маъсул деб кўрилган Ўзбекистон ҳукумати мулозимларининг Оврўпога сафар қилишларига қўйилган тақиқни олти ойга тўхтатган.

Ўзбекистонга қарши қурол-яроғ эмбаргоси сақлаб қолинган.

Бу ҳақда Оврўпо Иттифоқига аъзо 27 давлатлар ташқи ишлар вазирларининг учрашуви
ниҳоясида эълон қилинган.

Тарқатилган баёнотда айтилишича, иттифоқ Ўзбекистондаги инсон ҳуқуқлари вазиятидан ҳануз жиддий хавотирда.

Оврўпо Иттифоқи ўзбек расмийларининг диалогга киришиш хоҳиши ва охирги йил мобайнида икки томонлама муносабатларда рўй берган ижобий ўзгаришларни олқишлайди, дейилади баёнотда.

Оврўпо Иттифоқи Марказий Осиё бўйича стратегиясига мувофиқ Ўзбекистон билан кенг сиёсий диалог ва ҳамкорликни мустаҳкамлаш учун тайёрдир, дейилади баёнотда.

Оврўпо Кенгаши ўзбек расмийларини инсон ҳуқуқлари соҳасида яна ҳам илгари силжишга ва қонун устуворлигини ўрнатиш, халқаро ташкилотлар вакилларининг мамлакат қамоқхоналарини бориб кўришларига рухсат бериш, БМТнинг Қийноқлар бўйича махсус маърузачиси билан самарали ҳамкорликка киришиш, инсон ҳуқуқлари ҳимоячиларини ҳибсхоналардан озод қилиш ва уларга нисбатан тазйиқларни тўхтатишга даъват қилган.

Шунингдек, иттифоқ баёнотида адлия, ҳуқуқ-тартибот органларига тааллуқли қонунларни ислоҳ қилиш даъват этилади.

Ўзбекистондаги элчилар ҳисоботлари асосида мамлакатдаги вазиятга ҳамда декабр ойида кутилаётган президентлик сайловларига баҳо берилиши ҳам айтилади Оврўпо Иттифоқининг Ўзбекистонга тегишли эълон қилган сўнгги ҳужжатида.

'Виза тақиқи олти ойга бекор қилиниши керак'