Оврўпо Иттифоқининг Марказий Осиё бўйича вакили Пьер Морелга кўра, уч ойлик муҳлат янгича қарорлар олиш учун эмас, вазиятни баҳолаш ниятида белгиланганди

Андижон воқеалари ортидан Ўзбекистонга қарши киритилган Оврўпо Иттифоқи жазо чораларини кўриб чиқиш учун илк муҳокама муддати етиб келган. Аммо муҳокамадан ҳозиргача дарак йўқ.

Оврўпо Иттифоқи Ташқи ишлар вазирлари ўтган ноябр ойи Андижон воқеаларида масъул, деб кўрилган ўзбекистонлик мулозимларга нисбатан виза
таъқиқини ярим йилга, қурол-яроғ
эмбаргосини эса бир йилга узайтирганди.

Аммо худди шу қаторда, Ўзбекистондаги вазиятга қараб, жазо чоралари ҳар уч ойда муҳокама этилишига ҳам келишилганди.

Илк уч ойлик муҳлат тугаганига қарамасдан, ҳамон муҳокамадан дарак йўқлигини эса Оврўпо Иттифоқи масъуллари техник англашилмовчилик натижасидаги талқин туфайли юзага келган, деб тушунтираяптилар.

Иттифоқнинг Марказий Осиё бўйича махсус вакили Пьер Морелнинг Би-би-си Ўзбек хизматига айтишича, эълон этилган уч ойлик муҳлатда вазиятга баҳо бериб чиқилади.

"Ушбу кенгашда Ўзбекистонга қарши жазо чоралари борасида қарорлар қабул қилинмаслигини яна бир бор такрорлашни истардим" - деди Пьер Морел.

Маълум бўлишича, айтилаётган "баҳолаш кенгаши" феврал ойи ўрталарига мўлжалланган, аммо унинг қайси кун ўтишини Оврўпо Иттифоқига раислик қилаётган Олмония белгилайди.

"Вазият баҳолаб чиқилгач, олти ойдан сўнг ўзбекистонлик мулозимларга нисбатан виза таъқиқи борасидаги чора бўйича қарор қабул қилинади" - деди жаноб Морел.

Мазкур ярим йиллик муддат эса келаётган май ойининг ўрталарида тугайди. У вақтга бориб, виза таъқиқи масаласи иттифоқнинг Ташқи ишлар вазирлари эътиборига ҳавола этилади.

	Ўзбек муҳожирлари ҳам жазо чораларидан қатъи назар, Оврўпо Иттифоқи қайсидир даражада Ўзбекистон билан алоқаларини ушлаб туриши керак, деган талабларни айтиб келишади

Ўтган декабр ойида эса Оврўпо Иттифоқининг бир гуруҳ экспертлари Ўзбекистон билан техник учрашувларни тиклаш борасидаги иттифоқ қарори ортидан Тошкентга боришган эди.

Аммо айни гуруҳ олиб бораётган ишлар ҳали ниҳоясига етмаган ва иттифоққа раислик қилаётган Олмония гуруҳ иши билан яқиндан шуғулланмоқда экан.

Пьер Морелнинг айтишича, Тошкент ва Берлин ўртасида
ҳозир бу борада қизғин
музокаралар ҳам бораяпти.

Андижон хунрезлиги ортидан Ўзбекистон Ғарбнинг мустақил халқаро текширув ўтказиш талабларини рад этаркан, Оврўпо Иттифоқи Ўзбекистон билан техник учрашувларни бекор қилиш, Андижон воқеаларига дахлдор, деб кўрилган ўзбекистонлик мулозимларга виза таъқиқларини киритиш ҳамда қурол-яроғ эмбаргоси жорий этиш борасида жазо чоралари киритганди.

Лекин орадан бир йил ўтгач, Ўзбекистон киритилган жазо чораларига катта эътибор қаратмаган эса-да, санкцияларнинг техник учрашувлар қисми бекор қилинди.

Олмония эса, умуман, жазо чораларини босқичма-босқич бекор қилиш таклифини илгари сурмоқда.

Таҳлилчиларга кўра, Ўзбекистон билан алоқаларда катта иқтисодий ва сиёсий таъсир воситаларига эга бўлмаган Оврўпо Иттифоқининг жазо чоралари ҳам самарасиз бўлаётир.

Бошқа томондан, Ғарбнинг босимларига букилмаган Ислом Каримов ҳукумати тез орада Россия ва Хитой билан ҳамкорликни кучайтирганди.

Бироқ Россия газ қувурларига қарамликдан қутулиб, ўз энергетика манбаларини ранг-баранглаштиришга интилаётган Оврўпо дипломатлари нефт ва газга бой минтақанинг айнан Озарбайжон, Қозоғистон, Туркманистон ва Ўзбекистон каби давлатлари билан алоқаларни узиб юбориб бўлмаслигини ҳам очиқ айта бошлашган.