Жазо чораларини ҳар уч ойда қайта кўриб чиқиш мўлжалланган

Оврўпо Иттифоқининг Ўзбекистонга қарши жазо чоралари ўтган йил ўн тўртинчи ноябрида кучга кирган эди.

Андижон воқеалари манзарасида ва хусусан, Ўзбекистон ҳукумати Андижонда нималар бўлгани юзасидан халқаро текширув ўтказишга рухсат бермаганидан сўнг Оврўпо Иттифоқи расмий Тошкент билан мулоқотларни
қисман тўхтатиш ҳақида қарор
қабул қилди.

Бир неча юз кишининг ўлимига сабаб бўлган Андижондаги воқеалар учун тўғридан-тўғри масъул, деб кўрилган ўн икки ҳукумат мулозимларининг Оврўпога сафар қилишлари тақиқланди.

Ўзбекистонга қурол-яроғ, ҳарбий ускуналар ва ички қатағонларда ишлатилиши мумкин деб кўриладиган бошқа жиҳозларни экспорт қилиш маън этилди.

Гарчи Оврўпо Иттифоқининг ТАСИС дастури лойиҳаси доирасида Тошкентда иттифоқ иштирокида амалга ошириладиган лойиҳаларга техник кўмак кўрсатувчи Оврўпо уйи очилган бўлса ҳам ҳозирда Ўзбекистонда Оврўпо Иттифоқи ўзининг юқори даражадаги ҳайъатига эга эмас.

Ўзбекистон ва Оврўпо Иттифоқи ўртасидаги ҳамкорлик кенгашининг шу йил ноябр ойининг дастлабки ҳафтасида Брюсселда ўтган йиғини Ўзбекистонга қарши жазо чоралари эълон қилинганидан кейинги биринчи учрашув эди.