Iqlim isishi O‘zbekiston qishloq xo‘jaligiga qanday ta‘sir qilishi mumkin?

Jahon banki oxirgi hisobotiga ko‘ra, O‘zbekiston va unga qo‘shni mamlakatlar qishloq xo‘jaligi borasidagi bashoratlar ancha xavotirli.

Iqlim o‘zgarishlarining ziroatga ta‘siri tadqiq qilingan hisobotda Markaziy Osiyodagi harorat 50 yildan so‘ng 2-3 gradusga oshishi, sahro hududlarida yog‘ingarchilik yiliga o‘rtacha hisobda 50 millimetrga kamayishi aytiladi.

Hisobotga ko‘ra, agar suv disbalansi muammosi hal qilinmasa, ko‘plab ziroat turlari hosildorligi 20-50 foizgacha kamayib ketishi mumkin.

Toshkentlik ekolog olim Ahmadqul Ergashev esa, haroratning bu darajada ko‘tarilishi juda xavotirli emasligini aytadi.

"Bizdagi iqlimshunos olimlarning aytishlari bo‘yicha ham 1.5, 1.8 darajani ko‘rsatgan. 2020-2050 yillarda dunyo bo‘ylab harorat 1.5-1.8 gradusga ko‘tarilishi aytiladi. Bu unchalik xavfli emas", deydi ekolog olim.

Ammo, bu holatga ham hozirlik ko‘rish uchun, olimning aytishicha, suv zahiralaridan o‘ta tejamkorlik bilan foydalanish lozim bo‘ladi.