Тожик қўшиқчиси урушни қоралагани учун Россияда нафратга учрамоқда - Россия Украина янгиликлар

26 август 2022

2021 йилги "Евронигоҳ" танловида Россияни тамсил этган Тожик қўшиқчиси Манижа Сангин Украина урушига қарши чиққани учун кибер таҳдидлар остида қолди.

Манижа Сангин Россиянинг Украинага босқинига кескин қарши чиқди, урушни Россия халқининг истагига зид можаро деб атади.

Шу туфайли қўшиқчига қарши уни Россияда ёмонотлиқ қилиш онлайн кампанияси бошланган.

Алоқадор мавзулар:

Манижанинг Россия бўйлаб режалаштирилган концертлари бекор қилинди.

"У, жамоаси ва промоутерларига таҳдидлар бўлди", деб айтди Манижа Сангиннинг матбуот котиби Сергей Яковлев Би-би-сига.

Телеграмда Манижанинг ҳам қатнашиши кутилган сентябрь ойидаги Александровская қалъаси фестивали ташкилотчилари манзили ва телефонлари эълон қилиниб, "Россия армиясига қарши чиққани учун Манижанинг концертини бекор қилишни сўраб ёзинглар" деган талаб янгради.

Фестиваль ташкилотчилари шикоятлар бомбардимони остида қолганларини тан олдилар.

Skip Энг кўп ўқилган and continue reading

Энг кўп ўқилган

End of Энг кўп ўқилган

Сурат тагсўзи, Манижа қўшиқ ёзиш ва ижро қилишни давом эттиришга ваъда берди

Манижа Тожикистонда туғилган, 1990-йиллардаги фуқаролар уруши туфайли оиласи ватанини тарк этишга мажбур бўлган эди.

У болалик уруш уқубатларини яхши эслайди.

Россия Украинага бостириб кирганидан кейин Манижа "Аскар" деган қўшиқ ёзди.

Тожикистондаги урушга бағишланган ушбу қўшиқда "Урушни тўхтатинг!" деган чақириқ янграйди.

Украина ишғоли бошланганидан кейин Россия Президенти Путин "уруш" ёки "ишғол" сўзларини қўллашни тақиқлаш ҳақидаги фармонни имзолади, омма олдида "уруш" сўзини ишлатганларга нисбатан 15 йиллик қамоқ жазоси белгиланди.

Оқибатда Манижанинг қўшиғи устидан Россия Ички ишлар вазирлигига шикоятлар бўлди, уни Россия қуролли кучларини обрўсизлантиришда айбладилар.

Манижани Францияга чиқиб кетгани учун ҳам айбладилар, "сотқин" деб атадилар, у эса автофалокатда жароҳатланган синглиси олдида бўлиш учун боргани, кейин яна Россияга қайтганини айтди.

Манижа ҳам, унинг яқинлари ҳам ўзига қарши онлайн кампания ортида ким турганини билмасликларини айтадилар.

"Балки улар Украинадаги махсус ҳарбий амалиётни қўллаб-қувватлаётганлардир ёки Манижанинг миллий келиб чиқишига қарши бўлган одамлардир", дея тахмин билдирди Манижа Сангиннинг матбуот котиби.

Шу йил кузида Манижа "Бекор қилинмаган тур" деб номланган концерт турлари ҳақида эълон қилди, бу концертларнинг Арманистон, Грузия, Қозоғистон ва Қозоғистонда ўтказилиши режалаштирилган.