Афғонистон, Қандаҳор: Жума намозида худкушлик портлаши содир этилди Afg'oniston Tolibon Qandahor

Афғонистоннинг Қандаҳор шаҳридаги Шиа масжидида Жума намози пайти уч худкушлик портлаши содир этилгани оқибатида камида 37 инсон ҳалок бўлган.

70 дан ортиқ одам яралангани хабар қилинмоқда.

Биби Фотима деб аталган масжид ичидан портлашлардан кейин олинган фото ва видеоларда дераза ойналари синиб кетгани, ерда ётган жароҳатланиб ёрдам сўраётган ва ҳаётдан кўз юмган инсонларнинг жасадларини кўриш мумкин.

Афғонистон шимолидаги Қундуз шаҳри масжидига қилинган ҳужумда 50 инсон ҳалок бўлган

Толибон масъулларининг Би-би-сига айтишларича, булар худкушлик портлашлари бўлган.

Қандаҳорлик журналистнинг Рейтер ахборот агентлигига айтишича, масжид ичида бўлган намозхонлар уч ҳужумчи бўлганини айтишган.

Худкуш ҳужумчилардан бири ўзини масжид дарвозаси олдида, яна иккитаси масжид ичкарисида ўзларини портлатганлар.

Ҳужумчилар Жума намозига масжидга йиғилганларни нишонга олганлар.

"Франс Пресс" ахборот агентлиги масжид олдига камида 15 та "Тез ёрдам" машинаси келганини хабар қилган.

Толибоннинг махсус хизматлари масжид атрофини ўраб олганлар, одамлардан яраланганлар учун қон топшириш илтимос қилинган.

Кўпчилик ушбу портлашни ҳам ўзини Исломий Давлатнинг Хуросон қаноти деб атайдиган гуруҳ содир этган, деган фикрда.

Қандаҳор Афғонистоннинг иккинчи йирик шаҳри ва Толибон ҳаракати асос солинган жой деб кўрилади.

Қандаҳорга ҳужумни Толибонга душман деб қарайдиган ИШИД муҳим деб билган.

Ўтган жума - 8 октябрь куни худкуш ҳужумчи Афғонистон шимолидаги Қундуз шаҳрида Шиалар масжидига Жума намозига йиғилган намозхонларни нишонга олган эди.

Портлаш оқибатида камида 50 инсон ҳалок бўлган.

Ҳужум учун масъулиятни ИШИД-Хуросон ўз зиммасига олган.

Қундуз масжидига ҳужум АҚШ қўшинлари Афғонистондан чиқиб кетганидан кейинги энг ҳалокатли ҳужум бўлди.

Сунний мусулмонларидан таркиб топган ИШИД-Хуросон Афғонистондаги жиҳодчи гуруҳлар орасида энг экстремист ва зўравони деб кўрилади.

Бу гуруҳ Афғон хавфсизлик кучлари, Афғон сиёсатчилари ва вазирларини, Толибонни, Шиа мусулмонлари ва Сикхлар каби диний озчилик вакилларини, АҚШ ва НАТО ҳарбийларини, халқаро ташкилотлар ва ҳатто кўмак ташкилотларини ҳам нишонга олган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek