Россия, мигрантлар: Биз билан ҳам учрашинг, бизни ҳам эшитинг, Президент Мирзиёев! O'zbekiston Rossiya migrantlar

Россия Президенти Владимир Путиннинг таклифига биноан Президент Шавкат Мирзиёев Москвада икки кунлик амалий ташриф билан бўлади. Пойтахтда 24 июн куни Ғалабанинг 75 йиллиги муносабати ўтказиладиган тантанали тадбирларда иштирок этиш билан бирга расмий учрашувлар ҳам ўтказилиши кутилмоқда.

Кремл матбуот котиби Дмитрий Песков Владимир Путин парадга келган президентлар учун алоҳида қабул ташкил қилинишини билдирганди.

Мирзиёев нега Путин таклифини рад этмади? O'zbekiston, Россия - BBC News O'zbek

Мигрантлар Мирзиёевни кутишмоқда

Россиядаги ўзбекистонлик меҳнат муҳожирлари президент Мирзиёевнинг Москвага ташрифини кутишмоқда.

Шавкат Мирзиёев хукумат тепасига келганидан бери Россиядаги меҳнат муҳожирлари муаммоларига эътибор қаратган, улар учун бир неча енгилликларни жорий этди. Аммо ҳали бирон марта ўзбекистонлик меҳнат муҳожирлари билан учрашмади.

"Президент Шавкат Мирзиёев Москвага келар экан, шу баҳонада Москвадаги фаоллар билан учрашиб, муҳожирларни шу кунгача қийнаб келаётган муаммоларни, таклифларни эшитиб, мулоҳаза қилиб, таклифларни ижобий ҳал этса яхши бўлармиди?!

Шу кунгача муҳожирларни ҳеч ким эшитмай келаяпти, уларнинг вакиллари, яъни фаоллар билан кўришишнинг, уларни эшитишнинг ва муаммоларини ечишнинг вақти келди, деб ўйлайман", деб ёзди Москвадаги меҳнат муҳожири Аббос Акром Фейсбукдаги саҳифасида.

Бу йил Россиядаги шароит минглаб ўзбекистонликлар учун ҳар қачонгидан ҳам оғир кечмоқда. Пандемия карантини чекловлари ортидан минглаб мигрантлар ишсиз, пулсиз ва чорасиз қолишган.

Норозилик намойишлари

Россиянинг бир қатор ҳудудларида Конституция таҳрири ва президентлик муддатининг нолга тенглаштиришга қарши норозилик намойишлари бўлиб ўтмоқда.

22 июн куни Москва марказида шундай намойишларнинг бири полиция ва махсус хизматлар томонидан тўхтатилди. Лубянка ва Петровка кўчаларида юзлаб кишилар ўз норозиликлари ифодаси сифатида митинг ўтказишган.

Ҳукумат билан келишилмаган дея ҳисобланган акциянинг ўнлаб иштирокчилари кучишлатар тизимлар ходимлари томонидан қўлга олиниб, автобусларга тиқиб олиб кетилган.

Бу борада РФ ИИВ ҳали расман маълумот бергани йўқ.

Карантин янада юмшатилди

23 июндан бошлаб Москвада карантин чекловлари чораларининг юмшатилиши бўйича 3-босқич амалга кирди. Барча ресторан-кафелар, фитнес марказлар, спорт майдончалари, болалар боқчалари, туристик агентликлар, ҳиёбон ва истироҳат боғларининг иш фаолияти тикланди. Шу билан бирга шаҳарда ниқоб тартиби сақланиб қолади. Бу ҳали карантин чекловларининг бутунлай бекор қилиниши эмас.

Бу енгилликларнинг 3 босқичи ҳақида пойтахт Мэри Собянин 8 июль куни маълум қилган эди. Москвада оммавий тадбирларга тақиқ сақланиб қолган. Шунга қарамай ҳукуматнинг ўзи Ғалаба куни учун кенг миқёсли намойиш ва 1 июль куни Конституция таҳрири бўйича овоз бериш тадбирларини ўтказмоқда.

Кўрсаткичлар пасаймоқда

Россияда бешинчи кунки, коронавирусга чалинганлик қайд этилиши ҳолатлари пасайиб бормоқда. Ўтган кеча кундузда Россиянинг 84 ҳудудида 7425 та ҳолат қайд этилган. Уларнинг энг катта қисми - 1081 та ҳолат билан Москвага тўғри келади, дея хабар берди коронавирусга қарши кураш тезкор штаби. Бу 30 апрелдан буён (7099 та ҳолат) энг паст кўрсатгичдир.

Штаб маълумотига кўра, пандемия давридан буён жами 599 705 киши вирусга чалинганлиги қайд этилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek