Ўзбекистон: Сурхондарёдаги яна бир қудуқдан заҳарли газ чиқа бошлади, оммавий тартибсизликларга оид тартиб янада қаттиқлаштирилди ва президент АЭС лойиҳасини кўриб чиқди – дайжест

Куннинг энг сўнгги ва муҳим хабарлари билан дайжестимизда танишинг.

27 март кечаси Бойсундаги ўтган йил кузида авария содир бўлган газ кониги яна бир қудуқдан водород сулфиди сизиб чиқиши ҳолати кузатилган.

Энергетика вазирлигининг маълум қилишича, газ сизиб чиқиши "назорат остида" юз берган.

Вазирлик заҳарли газ табиатга зиён етказмаслиги ва ҳаво ифлосланишининг олдини олиш мақсадида қудуқ ёқиб қўйилганини билдирган.

Расмий хабарда воқеа жойига зудлик билан Фавқулодда вазиятлар вазирлигининг бригадаси, Энергетика вазирлиги ҳамда бошқа мутасадди ташкилотлар таркибида ташкил этилган махсус штаб вакиллари етиб боргани ҳақида сўз боради.

Энергетика вазирлиги юзага келган ҳолат аҳоли ва яқин атрофдаги ҳудудларга ҳеч қандай хавф туғдирмаслигига ишонтирган.

"Ҳозирги вақтда ушбу вазият ҳамда ёнғиннинг келиб чиқиши сабаблари ўрганилмоқда. Бу ҳақдаги батафсил маълумот ишлар якунланганидан сўнг маълум қилинади", дейилади Энергетика вазирлиги тарқатган расмий ахборотда.

Маълумот ўрнида, Бойсундаги "Мустақилликнинг 25 йиллиги" газ конидаги қудуқлардан бирида ўтган йил сентябрида техноген авария юз берган ва атрофга тарқалган заҳарли газдан маҳаллий аҳоли азият чекаётгани бир неча бор хабар қилинган.

"Эслатиб ўтамиз, "М-25" газ конини ўзлаштириш жараёни ўзига хос мураккабликка эга бўлиб, бу ерда халқаро тажрибадан фойдаланиб, кучайтирилган назорат чоралари амалга оширилмоқда", маълум қилган Энергетика вазирлиги ўзининг 28 март тонгида тарқатган хабарида.

Кучайтирилган жавобгарлик

Ўзбекистонда оммавий тартибсизликлар содир этиш мақсадида ўқувдан ўтганлик учун жавобгарлик белгиланди.

Адлия вазирлигининг хабар қилишича, 27 март куни кучга кирган тегишли қонун билан Жиноят кодексининг 244-моддасига ўзгартириш киритилган.

Ушбу ўзгартириш билан оммавий тартибсизликлар содир этиш мақсадида ўқувдан ўтганлик ҳамда ушбу фаолиятни молиялаштирганлик учун жавобгарлик белгиланмоқда.

"Қонунга кўра, шахснинг оммавий тартибсизликлар содир этиш мақсадида ўқувдан ўтиши, шу жумладан оммавий тартибсизликларни содир этиш билимини, амалий маҳоратини ва кўникмаларини эгаллаши, ўқув чоғида қурол-яроғ, портлатиш қурилмалари, портловчи, заҳарловчи, атрофдагилар учун хавф туғдирадиган бошқа моддалар ва буюмлар билан муомала қилиш усулларини ўрганиши – БҲМнинг 300 бараваридан 600 бараваригача миқдорда жарима ёки 3 йилгача ахлоқ тузатиш ишлари ёхуд 5 йилдан 7 йилгача озодликдан маҳрум қилиш билан жазоланиши белгиланди", тушунтирилади расмий хабарда.

Шу билан бирга, маълум қилинишича, ушбу жиноятни содир этган шахс, "агар у ўқувдан ўтганлиги тўғрисида ҳокимият органларига ихтиёрий равишда хабар қилса, содир этилган жиноятни фош қилишга ёки бундай ўқувдан ўтган, ўқувни амалга оширган, ташкил этган ёхуд молиялаштирган бошқа шахсларни, шунингдек ўқув ўтказилган жойни аниқлашга фаол кўмаклашса ва агар унинг ҳаракатларида жиноятнинг бошқа таркиби мавжуд бўлмаса, жиноий жавобгарликдан озод қилиниши" билдирилмоқда.

Кўздан кечирилган АЭС лойиҳаси

27 март куни президент Шавкат Мирзиёев мамлакатда атом энергетикасини ривожлантиришга қаратилган вазифалар ижроси билан танишган.

Ўзбекистон ўтган йили Россия билан ҳамкорликда кичик қувватли атом электр станциясини қуриш лойиҳасини бошлаган эди.

Президент матбуот хизматининг хабар қилишича, ҳозирга қадар ушбу лойиҳани амалга ошириш имкониятларини муҳокама қилиш ҳамда "йўл харитаси" тайёрлаш мақсадида ишчи гуруҳларнинг учрашувлари ўтказилган.

Йиғилишда мутасаддилар лойиҳанинг бориши, ҳамкорлар билан музокаралар юзасидан президентга ахборот берган.

"Халқаро атом энергияси агентлиги билан 2025-2027 йилларга мўлжалланган Қўшма ҳаракатлар режаси ишлаб чиқилди. Бўлажак станция қурилишининг ҳар бир босқичи – лойиҳалаштиришдан то битгунга қадар Халқаро атом энергияси агентлигининг қатъий назорати остида бўлади, жаҳоннинг энг илғор тажрибалари ва хавфсизлик талаблари татбиқ этилади", маълум қилинган расмий ахборотда.

Шунингдек, президент ҳузурида ўтган мазкур йиғилишда катта қувватли атом электр станциясининг техник-иқтисодий жиҳатлари ҳамда уни барпо этиш режалари кўриб чиқилгани ҳам айтилмоқда.