"Одамлар устимдан кулишган" - Қишлоқда блогер келин бўлиш осонми?

Муҳтарам – қишлоқ келини. У одатий турмуш тарзини ёритадиган блог эгаси. "Газсиз яшасам ҳам уйимда жаннат ярата олдим", дейди у.

Муҳтарам Ибодованинг Instagram'да 80 мингга яқин обуначиси бор. У ўз саҳифасида қишлоқлик аёлларнинг кунлик юмушлари: молларга қараш, ҳовлидаги ўтларни ўриш, томорқада экин экиш, мева ва сабзовотларни йиғиштириш, табиий газ етиб бормаган қишлоқда уйни иситиш жараёнларини ёритиб боради.

Блогер билан журналист Юлдуз Абдурашидова суҳбатлашган:

"Блогерлик мен учун жуда баракали бўлди. Видеочиқишларим орқали танилдим, шахсий брендим яратилди. Бироқ, доимий равишда камерани кўтариб юриш, турли воқеаларни видеога олишса одамлар ғалати қарашади: нима учун бу видеога оляпти, нега сёмка қиляпти дейишади", сўз очади Муҳтарам Ибодова.

Қаҳрамонимизнинг сўзларига кўра, қишлоқда видеоблоглар қилиш учун жуда кўп жараёнлар бор, бироқ уларни камерага муҳрлаш қийин, айниқса аёл киши учун.

"Қишлоқда видеога олишса, одамлар худди "уларни видеога олиб, устидан кулаётгандек" ҳис қилишади. Қўни-қўшниларим "мени видеога олманг, сёмка қилманг, интернетга чиқиб кетмай тағин, сизни кузатадиган қариндошларим устимдан кулишади", дея мени мазах қилишгандек бўлади. Худди "ўзингни интернетда кўз-кўз қилгандек, мени ҳам Инстаграмга чиқариб юборма" дегандек гаплар қилишади", дейди Муҳтарам.

Навоийлик қаҳрамонимнинг айтишича, турмуш ўртоғи ҳамда ўғли унинг фаолиятига қаршилик кўрсатмайди, қайнукаларидан бири норози, бир эса қўллаб-қувватлайди.

Қариндошларим гап-сўз қилишган

Бошида қариндошларимиз томонидан гап-сўзлар, турмуш ўртоғимга тазйиқлар бўлган. Қайнотам Instagram'га кирмайди, қайнукаларим кузатишади: улардан бири нормал қабул қилишган аммо иккинчиси ҳали-ҳалигача норози. Эрим тарафдан ҳам, ўзим томондаги қариндошлар ҳам бошида устимдан кулишган. Кейинчалик нормал қабул қилишди. Кибр эмас-у аммо кейин ёрдам сўрай бошлади. Устимдан кулган одамлар энди бирон маҳсулотини ёки видеоларини ижтимоий тармоқдаги саҳифаларимга жойлаб беришимни сўрай бошлади. Бундан кибрга берилганим йўқ, уларни нормал қабул қилганман. Фақат турмуш ўртоғимга тазйиқ ўтказа бошлаганида хафа бўлганман.

"Хотинингни интернетга чиқаряпсан", "хотининг юлдуз, унинг видеолари тарқалиб кетган" дейишган. Эрим Россиядан Ўзбекистонга қайтган вақтлари бирга видео қўйганман ҳазил тариқасида. Видеони миллионлаб кузатувчи кўрган, туманимиздагилар орасида гап-сўз чиққан. Кейин хўжайнимнинг танишлари ўртасида роса муҳокама бўлган. Қариндошлар "сен билан хотининг бизни кулгуга қўйяпсан" дея гапирган. "Видео қўйма, тамом" дегандилар ўша пайт. Ҳатто Instagram'имни ўчириб ҳам юборганлар.

Эрим қўллаб-қувватламоқда

Ўшанда ҳеч нарса демаганман, асабийлашган вақти жим туришни маъқул кўраман. Кейинчалик кайфияти яхши маҳал қайта платформани тиклаб олганман. "Ўғлимизни, қишлоқни кўрсатсанг кўрсатавер, аммо уйимизни, мени қўйма" деганди турмуш ўртоғим. Ўшанда айтганларини қилганман, бироқ кейинчалик одатий видеолар олишимга рухсат берган.

Ҳозир эрим қўллаб-қувватлайди. Турли курсларга пул керак бўлса беради. Мен фақат турмуш ўртоғимга қулоқ соламан, "қайнотанг-қайнонанг-чи?" дейиши мумкин, биз алоҳида яшаймиз, фақат турмуш ўртоғим, мен ва ўғлимнинг фикри муҳокама қилинади, одамларнинг фикр инобатга олинмайди. Қарорни ўзимиз муҳокама қиламиз, ўзимиз чиқарамиз, тамом!

Одамлар блогерлардан фойда олаяпти

Instagram блогерларига кўпчилик жиддий қарамайди. Сабаби ҳамма блогер бўлиб кетган ва жуда кўпчилик блогер бўлишни хоҳлайди. Лекин баъзилари енгилтак қарашдаги видеолар олиб, ўзини кулгига қўяди. Балки шунинг учун ҳам бунга жиддий иш сифатида қаралмас.

Менга кўпчилик тренддаги видеолардан олинг деб айтишади. Лекин бу ишни камдан кам қиламан. 10 та тренд видео чиқса биттасини қилиб кўраман. У ҳам менинг қадриятимга тўғри келса ва мени кулгига қўймаса. Одам ўзини кулгига қўйиб видеога олаётгани бу ишга енгил қаралаётганига сабаб деб биламан.

Одамлар блогерлардан фойда олаяпти деб ўйлайман. Масалан, авваллари рекламалар телевиденийага реклама бериши керак ва бунга катта пул сарфлаши керак эди. Энди жуда кўпчилик Instagram орқали, блогерлар орқали таниляпти. Масалан, айлайлик, сиз оддий тикувчисиз ва сизнинг ишингизни фақат туманингиздаги одам билади. Лекин шаҳарга чиқмоқчисиз, харидор тўплаш учун афиша ёпиштириб, телевиденийага реклама бериб ўтирмайсиз. Ўша ерда машхур бўлган блогерга рекламан берасиз, одамлар сизнинг ишингиздан хабар топади. Бу одамларга онлайн бозор, уйда ўтирган ҳолда ишлашини таъминлаб беради.

Жуда кўпчилик блогерларни осон пул топади деб ўйлайди, лекин бу даражагача келишнинг ҳам ўзи бўлмайди. Бу ишда аудиториянинг ишончи жуда муҳим. Шу ишончни қозониш учун ҳам анча тер тўкилади. Агар бир ой давомида видео қўймасангиз, одамлар сиздан зерикади. Яхши видео қилмасангиз одамлар сизни кузатишни тўхтатади. Блогер ўсиши ва ривожланиши учун, доимо видеолар олиши керак. Видео олиш учун блогер ўйланади, изланади, нима қилсам экан, одамларни кўнглини оғритиб қўймадимми дейди. Трендга чиққан бир кулгили видео миллионлаб кўриш олади, лекин одамларга фойдали бўлган видео жуда ҳам кам кўрилади. Бу жуда ҳам ачинарли ҳолат. Аслида, фойдали видеоларни кўпроқ олиб, одамларни савиясини ўстириш керак деб, ўйлайман.

Тухум сотишдан Россияда ишлашгача

Блогерлик ҳам оддий иш эмас, уни касб даражасига чиқарганлар, ўз устида доимий ишлайдиганлар яхши даромад қилади. Блогерлик оддий иш эмас, лекин буни шундай кўрсатадиган одамлар кўпайиб кетди.

Қишлоқда аёлларнинг иши кўп. Бунинг ёмон тарафи йўқ. Мен кўп қаватли уйда ҳам, ҳовли уйда ҳам яшаб кўрганман, ҳовлида нисбатан иш кўп, барибир. Айниқса, ёзда жуда ҳам кўпайиб кетади. Деҳқончилик қилинади, ер чопилади, ўт ўрилади, молга қаралади. Мендан аксар кишилар "шунча ишдан ортиб, блог юритишга қандай улгурасиз?" деб сўрашади. Менинг жавобим: ишимни яхши кўраман. Мен шу пайтгача жуда кўп иш қилиб кўрганман. Балки кулгили туюлар, лекин бир вақтлар қайнукам билан бозорга чиқиб, тухум сотганмиз. Ундан ташқари улгуржи кийим-кечак олиб келиб сотганмиз. Қайнотамни жуда катта ери бор эди. Томорқамизга помидор экиб, уларни сотганмиз. Россияда ишлаганман. Ўзим аслида тикувчиман, ўқимишли эмасман, лекин мактабни қизил шаҳодатнома билан битирганман.

Тиббиёт олийгоҳига ўқишга кирмоқчи эдим, лекин тақдир эмас экан, Аллоҳ пешонамга бошқа нарсани ёзган экан, маълум сабабларга кўра, киролмадим. Ўқишга кирмасдан турмушга чиққанман. Ҳатто бир марта ҳам тиббиёт институтига топшириб кўрмаганман. Ўқимаганим, ишламаганим билан, уйда шунчаки уй, рўзғор ва бола-чақага аралашиб қолишни хоҳламайман. Доимий равишда ўсиб, ривожланиб, билим олиб, ўз устимда ишлайман. Одам ўз ишини севса, ҳамма нарсага улгурар экан. Ишларимни кеч бўлиб кетса ҳам қилиб, кейин ухлайман.

Ишимни севаман

Турмушга чиқмасдан аввал тикувчиликни ўрганганман. Аёллар учун буюртма кийимлар тикар эдим. Қишлоқ шароитида ўзим хоҳлаган нархни ололмаганим, одамларга мана шунча беринг дея олмаганим сабабли бу ишдан кўнглим қолиб кетган. Бу ишдан кетдим. Instagram йўналишига ўтиб кетганимдан кейин, кечаси кимдир уйғотиб, тур мана буни монтаж қилиб бер деса шартта уйғониб монтаж қиладиган даражага келдим. Бир интервьюда эшитгандим: сен ўз севган касбингни қанақа қилиб топасан дейилганда, кечаси уйғониб ўша ишни қила олсанг, у иш сеники бўлади дейилган. Эртабгача ухламай ишлаган ватларим бўлган. Шуларни ўйлаб, ҳа, бу менинг яхши кўрган касбим экан дейман. Уй ишимни ҳам қиламан, блогимни ҳам юритаман. Кўпроқ одамлар ҳовлида қилган ишларингизни кўрсатинг деб сўрайди.

Ўз соҳамга ҳаддан ошиқ меҳр қўйганимдан, қанча пулим кетса ҳам, ўзимга устбош олмасам ҳам, қанақадир тақинчоқ олмасам ҳам, тиллага қизиқмайман, вақти соати келса, олишим мумкин, лекин ҳозирча умуман қизиқмайман унақа нарсаларга, қўлимга қанча пул тушса, курс сотиб оламан, билим сотиб оламан. Мен ишонаманки, сарфлаган пулим вақти келиб, юз фоиз ўзини оқлайди. Ҳаракат қилсам, жуда ҳам кўп муваффақиятларга эришишимга ишонаман.

Ҳозир фақат блогерлик қилмайман, ўзим SMM бўйича курс ташкиллаштирганман, шогирдларим бор. Қолаверса бошқаларнинг Instagram саҳифаларини юритаман. Рекламаларим бор.

Даромади яхши. Уни ўзимнинг шахсий харажатларимга сарфлайман. Турли танловларда қатнашиб Iphone ҳам ютиб олганман. Нақ иккита. Пулларимга турли хил курслар сотиб оламан. Ўз устимда ишлайман доим.