Дайжест: Душанбеда Украина урушининг 1000 кунлиги, қўшни мамлакатларга ID-карталар билан
Сурат манбаси, BBC O'zbek
Хориж матбуоти эътиборини Ўзбекистоннинг қўшнилари билан чегарадан ўтишни осонлаштириш режаси тортди.
Ўзбекистоннинг янги шаклланган парламентининг 20 ноябрдаги илк мажлисида маъруза қилган Президент Шавкат Мирзиёев ҳукумат режаларига тўхталди, улар орасида оддий одамларнинг қўшни мамлакатларга ўтиб-қайтишини осонлаштириш ҳам бор.
2023 йил 1 сентябридан Ўзбекистон ва Қирғизистон фуқароларининг чегарадан хорижга чиқиш паспорти билан эмас, ID карталарни кўрсатиб ўтишлари тартиби жорий қилинган эди.
Энди Ўзбекистон фуқароларининг Қозоғистон ва Тожикистон чегараларини фақатгина ID карта орқали кесиб ўтиши тартибини жорий этиш режалаштирилаётганини маълум қилди Президент Мирзиёев.
"Марказий Осиё мамлакатлари билан яхши қўшничилик алоқаларини янада ривожлантириш бизнинг ташқи сиёсатимизда устувор бўлиб қолади", дея Президент Мирзиёевдан иқтибос келтирди "Франс Пресс" ахборот агентлиги.
1991 йилда Совет Иттифоқи парчаланиб, Марказий Осиё мамлакатлари мустақил бўлганларидан кейин ўртада ишончсизлик ва мунтазамий баҳслар келиб чиқди.
Сўнгги йилларда минтақа мамлакатлари ўртасидаги муносабатлар илиқлашгани кузатилди, қўшнилар билан дипломатик саммитлар кўпайди.
Бу эса ҳам Ғарб мамлакатлари, ҳам Россия ва Хитойнинг минтақага қизиқишини тобора ортишига сабаб бўлди.
Душанбе шаҳрида Украина уруши қурбонлари хотирланди
Сурат манбаси, Reuters
Тожикистон пойтахти Душанбе шаҳридаги Муқаддас Иосиф черковида Украина уруши бошланганининг 1000 кунлиги муносабати билан тадбир ташкиллаштирилди.
Мухбирларга кўра, черковга Тожикистонда фаолият юритадиган хорижий элчиликлар вакиллари, Украина фуқаролари тўпланганлар, урушда ҳалок бўлганлар хотирланган, Украина халқига бирдамлик изҳор этганлар.
Черковда Россиянинг Украинага босқинига бағишланган фото кўргазма ташкил этилган.
Мухбирларнинг ёзишича, ушбу тадбир Тожикистон учун ноодатий ҳодиса бўлган.
Боиси, Тожик расмийлари қудратли қўшниси бўлган Россия билан Украина ўртасида дипломатик нейтралликни сақлашга мажбурланганлар.
Бошқа минтақа мамлакатлари каби Тожикистон ҳам Россиянинг Украинага босқинини қораламади, Россия Президенти Владимир Путин иштирокидаги кўплаб тадбирлар, хусусан, 9 майдаги Москва Қизил Майдонидаги ғалаба парадида Тожикистон Президенти Имомали Раҳмон ҳам қатнашиб келади.
Телеграм каналимиз:
