Бир ҳафтада икки қизалоқ — илгари жинсий зўравонлик учун қамалганлар яна жиноят қилди

Ўзбекистонда сўнгги бир ҳафта ичида икки вояга етмаган қизалоққа нисбатан жинсий зўравонлик ҳолати қайд этилди. Ҳар икки ҳолатда ҳам гумонланувчилар аввал педофиллик ва жинсий зўравонлик учун қамалган. Аммо "яхши хулқ" баҳонаси билан эркинликка чиқарилган ёки манзил колониясига ўтказилган шахслар бўлгани жамоатчиликни ғазабга солди.

Оҳангаронда — колониядан қочган маҳкум 9 ёшли қизни зўрлади

16 октябр куни Тошкент вилоятининг Оҳангарон туманида манзил колониядан қочган 31 ёшли маҳкум мактабдан қайтаётган 9 ёшли қизалоққа жинсий зўравонлик қилгани айтилмоқда.

Маълумотларга кўра, у 2018 йилда 14 ёшга тўлмаган шахснинг номусига тегиш айблови билан 16 йилга қамалган, аммо кейин жазо енгиллаштирилиб, колонияга ўтказилган. У ерда "фойдали меҳнат" ишларига жалб қилинган, кейин назоратсиз қолиб, қочиб кетган.

Жиноят содир этилгандан сўнг у тез фурсатда қўлга олинган, ҳозир қамоқда.

Наманганда қариндош педофил 7 ёшли қизалоқни зўрлади

14 октябр куни Наманган вилояти Янгиқўрғон туманида 38 ёшли эркак ўз қариндоши бўлган 7 ёшли қизалоқни зўрлади. У икки кунлик қидирувдан кейин ушланган.

Маълум бўлишича, у аввал ҳам жинсий жиноят учун жавобгарликка тортилган, кейин "ахлоқ тузатиш ишлари" сабабли муддатидан олдин озод қилинган.

Ҳозирда жабрланувчи қизалоқ шифохонанинг жонлантириш бўлимида, аҳволи барқарор.

"Бу фақат педофилнинг разолати эмас, тизимнинг юзи"

Фаоллар Ўзбекистонда жинсий зўравонлар, айниқса, вояга етмаганларга нисбатан зўравонлик қилганларга нисбатан жазо енгиллиги ва адолат қарор топмаётганидан норози бўлишган.

"Энди қайсидир катта бир амалдорнинг невараси ёки фарзанди педофилнинг ўлжасига айланишини кутиб ўтирамизми? Дуо қилиб сўрайликми? Унгача педофиллар учун енгил жазо ва меҳрибонлик кўрсатилаверадими?", деб ёзади блогер Мирсаид Ҳайдаров.

Блогер Рустамбек Тоғаев ҳам шундай фикр билдирган.

Олий Мажлис депутати Дилноза Азизова педофиллар учун умрбод озодликдан маҳрум қилиш жазосини киритишни таклиф қилди.

"Намангандаги воқеа — фақат бир педофилнинг разолати эмас, бу жиноятни йиллар давомида "ахлоқ тузатиш ишлари" деган юмшоқ ифода билан оқлаб келган тизимнинг юзи. Боланинг ҳаёти билан ўйнаш мумкин эмас. Бу фақат жиноят эмас — инсонийликка қарши қўзғолон. Шундай педофиллар жазо муддатини „яхши хулқ“ баҳонаси билан қисқартириб, кўчада эркин юргани — давлатнинг болага бўлган муносабатидан дарак. Қонун фақат қоғозда эмас, ҳаётда ҳам қаттиқ бўлиши керак. Бундай жиноятчилар учун кечириш, енгиллик ёки "яхши хулқ" деган гап бўлмаслиги шартлигининг яна бир исботига гувоҳ бўлдик", — деб ёзди депутат.

Қўшни давлатларда қандай?

Қозоғистонда педофилия учун жазо сиёсати сўнгги йилларда кескин кучайтирилди. 17 октябрда кучга кирган қонунга ўзгартиришга кўра, вояга етмаган шахсга нисбатан жинсий зўравонлик қилганларни кимёвий кастрация жазоси қўлланилади.

Қирғизистон парламенти ҳам 2023 йил педофиллик учун кимёвий кастрация жазосини маъқуллаган.

Октябр бошида Қирғизистон президенти Садир Жапаров бундай жиноятлар учун жазоларни янада қатъийлаштиришни ёқлаб чиқди.

Хусусан, у мамлакатда болалар ва аёлларга қарши жиноятлар учун ўлим жазосини қайтаришни таклиф қилди.

Бу 17 ёшли мактаб ўқувчисининг зўрланиши ва ўлдирилиши билан боғлиқ шов-шувли ишдан кейин рўй берди. Айрим ҳуқуқ фаоллари суд тизимининг ноқислигини таъкидлаб, ташаббусга қарши чиқди.