Янгиликлар: Қорача бўлгани учун хотинини тириклайин ёққан эркак ўлимга ҳукм қилинди

Ҳали йигирмага ҳам кирмаган ёшгина жувон касалхонада жон берган.

Мақолада кўнгилни хира қилувчи тафсилотлар бор.

Ўлим ҳукми

Ҳиндистон маҳкамаси терисининг ранги учун хотинига тириклайин ўт қўйган эркакка ўлим жазосини берди.

Лакшми ўлимидан аввал "қорачалиги учун эри Кишандас ўзини доимо таҳқирлаб келганлиги"ни айтиб берган.

Шимолий Удайпур шаҳридаги округ судьяси Раҳул Чоудхари эркакнинг нега олий жазога ҳукм этилгани сабабига алоҳида тўхталиб ўтган.

Ҳакам бу қотилликнинг "камдан-кам учрайдиганлари" тоифасига кириши ва у "инсониятга қарши жиноят" эканини айтган.

Кишандаснинг ҳимоячиси BBC га мижозининг айбсизлигини даъво қилган, суд ҳукми устидан шикоят билан чиқишларини билдирган.

Қотиллик

8 йил аввал амалга оширилган қотиллик юзасидан суд ҳукми шу дам олиш кунларида эълон қилинган.

Ҳукм одамларнинг тери рангига қанчалик катта аҳамият беришлари яхши ҳужжатлаштирилган мамлакатда катта шов-шувга сабаб бўлган, сарлавҳаларга чиққан.

BBC танишишга муваффақ бўлган суд ҳукмидан маълум бўлишича, қотиллик 2017 йилнинг 24 июнида содир этилган.

Унда Лакшмининг ўлимидан олдин полиция, шифокорлар ва ижроия судьясига айтган гапларидан иқтибослар ҳам келтирилган.

Лакшмига кўра, эри уни одатда "кали" ёки "қорача", деб чақирган, 2016 йилда турмуш қуришган бўлса, ўшандан буён танаси рангининг устидан кулиб келган.

У вафот этган кечаси эри пластик идишга солинган қўнғир рангли суюқлик олиб келган ва ўзига бунинг терини оқартирувчи дори эканини айтган.

Лакшмининг гапларига кўра, кейин эри суюқликни унинг танасига суртган, кислота ҳиди келаётганидан шикоят қилганида эса, тутантириқни олиб, ўзини ёқиб юборган.

Танаси ёна бошлаганида, идишда қолган суюқликни ҳам унинг устидан қуйган ва қочиб кетган.

Кишандаснинг ота-онаси ва синглиси Лакшмини касалхонага олиб боришган ва у ўша ерда ҳаётдан кўз юмган.

"Инсониятга қарши жиноят"

"Бу юракларни пора қилувчи шафқатсиз жиноят нафақат Лакшми, балки инсониятга қарши жиноят десам, муболаға бўлмайди", - деб айтган ўз ҳукмида судья Чоудхари.

Ҳакамнинг давом этишича, эри хотинининг "ишончини чилпарчин" қилган ва ёнаётган пайтда "қолган суюқликни ҳам устидан қўйиб, ҳаддан зиёд шафқатсизлик кўрсатган".

"Бу инсоният виждонини ларзага солувчи жиноятдир, уни соғлом ва цивилизациялашган жамиятда тасаввур қилиб бўлмайди", - дея таъкидланган ҳукмда.

Давлат прокурори Динеш Паливал суд ҳукмини "тарихий", деб атаган ва BBC билан суҳбатида бу "жамиятдаги бошқалар учун сабоқ бўлиши"га умид билдирган.

"Йигирма ёшлардаги ёшгина жувон ваҳшийларча ўлдирилди. У кимнингдир синглиси, бировнинг қизи эди, уни севадиганлар бор эди. Қизларимизни қутқармасак, ким қутқаради," - деган у.

Паливал ўлим ҳукмини тасдиқлаш учун Олий судга юборганини билдирган, шунинг баробарида, унинг устидан шикоят қилиш учун судланувчи ихтиёрида бир ой муҳлат борлигини ҳам эслатган.

Кишандаснинг адвокати Сурендра Кумар Менариянинг BBC га айтишича, Лакшмининг ўлими бахтсиз тасодифдир, сохта айбланган мижозига қарши ҳеч қандай далил бўлмаган.

Тери ранги

Удайпур судининг ҳукми яна бир Ҳиндистондаги ёрқинроқ терига бўлган носоғлом муносабатга эътиборни тортган.

Терисининг ранги тўқ бўлган қизлар таҳқиромуз муносабатлар, камситишларга дучор бўлишади, турли номларда аталишади, терини оқартирувчи маҳсулотлар миллиардлаб доллар фойда келтирадиган йирик бизнесга ҳам айланган.

Никоҳ агентликлари эълонларида терининг ранги деярли ҳар доим таъкидланади, оқишдан келган келинларга эса талаб ҳамиша катта бўлади.

BBC бундан аввал "териси рангининг тўқлиги" туфайли эрлари томонидан таҳқирланган аёлларнинг ўз жонларига қасд қилишгача борганликлари ҳақида ҳам хабар берган.

Сўнгги йилларда тарғиботчилар жамиятдаги терининг ранги қанча ёрқин бўлса, шунча яхши, деган кенг тарқалган тушунчани ўзгартиришга уриниб кўришди, аммо улар ҳам чуқур илдиз отган бу каби янглиш қарашларга қарши туриш осон эмаслигини айтишади.

Бирор бир ўзгариш бўлмаса эса, бундай камситувчи қарашлар ҳаётларни барбод қилишда давом этаверади.