€100 мингдан €40 миллионга: Абдуқодир Ҳусановнинг "Ман Сити"га трансфери ҳақида нималар маълум?
Сурат манбаси, Getty Images
Шу кунларда Абдуқодир Ҳусановнинг "Ланс"дан "Манчестер Сити"га ўтаётгани ҳақида хабар кўплаб ўзбекистонликлар эътиборида турибди. Англиянинг энг бой клубларидан бирига бу шов-шувли трансфернинг баъзи жиҳатлари BBC'га маълум бўлди.
"Манчестер Сити" марказий ҳимоячи Абдуқодир Ҳусанов борасида "Ланс" билан €40 миллион эвазига келишувга эришган.
Шартномадан хабардор манбаларнинг маълум қилишича, келишувга қўшимча бонус тўловлари ҳам киритилган.
Трансфер расман тасдиқланишидан олдин футболчи тиббий кўрикдан ўтиши керак.
"Ман Сити" бош мураббийи Пеп Гвардиола ўз жамоасини кучайтиришга қатъий бел боғлаган.
Сўнгги ойларда қийинчиликларга дуч келган клуб АПЛ жадвалида олтинчи ўринга тушиб кетган эди ва жадвал етакчиси "Ливерпул"дан 12 очко ортда қолмоқда.
Ўз трансфери якунлангач, Ҳусанов Премьер Лигага қўшилган биринчи ўзбекистонлик футболчи бўлади.
Шунингдек, у 2018 йилда Эмерик Лапортнинг келганидан бери "Ман Сити"нинг илк муҳим трансферига айланади.
Бу Гвардиоланинг "Ман Сити"ни қийин аҳволдан олиб чиқиш ва жамоани тарк этган асосий ҳимоячилар ўрнини қоплашдаги қатъиятини кўрсатади.
Рубен Диас 15 декабрь куни "Манчестер Юнайтед"га қарши мағлубиятдан сўнг майдонга тушмаган ва якшанба куни "Салфорд Сити"га қарши учрашувда ҳам қатнаша олмайди.
Англия ҳимоячиси Жон Стоунс ҳам ўйинда қатнаша олмайди, шу билан бирга, Натан Аке ҳам жорий мавсумда икки бор узоқ муддатли жароҳат сабабли ўйиндан чиқиб кетган.
"Ланс" Ҳусановни 18 ой олдин Беларусьнинг "Энергетик-БГУ" клубидан атиги €100 минг эвазига сотиб олган эди.
Бироқ у тез ривожланиб, жорий мавсумда Лига 1 – Футбол бўйича Франция чемпионати доирасида 13 та ўйинда қатнашган ва Ўзбекистон терма жамоаси учун 18 та ўйинда майдонга тушган.
Ҳусанов 22 декабрь куни Франция Кубоги доирасида "ПСЖ"га қарши ўйинда клубдаги илк голини киритган.
Шунингдек, "Ман Сити" Бразилиянинг "Палмеирас" жамоаси билан 18 ёшли ҳимоячи Витор Реис борасида музокаралар олиб бормоқда. Бироқ клуб президенти бу футболчини сотиш ҳақидаги миш-мишларни "ҳақиқатга мос эмас" деб атаган.
Бундан ташқари, "Ман Сити" жорий мавсумда "Айнтрахт" сафида ажойиб ўйинлар кўрсатган мисрлик ҳужумчиси Умар Мармушни сотиб олишга ҳам қизиқиш билдирмоқда.
