Ўзбекистон: Адлия вазирлиги Кушербаевни қоралаб чиқди, довондаги “балиқ ёмғири” ва яна чангли бўрон бўладими? – янгиликлар, O'zbekiston, yangiliklar

Депутатни қоралаган вазирлик

Адлия вазирлиги Олий Мажлис Қонунчилик палатаси депутати Расул Кушербаевнинг "қора бозор"да валюта айирбошлаганини қоралаб чиққан.

Вазирликнинг таъкидлашича, "қонунларга танлаб-танлаб риоя қилинмайди".

27 ноябрь куни депутат Кушербаев ижтимоий тармоқ орқали жонли эфирга чиқиб, Янгийўл шаҳрида бир соат давомида валюта айирбошлаш шаҳобчасини излагани, аммо шаҳобчалар дам олиш кунлари ишламаслиги ортидан қўлидаги $50 ни "қора бозор"да алмаштиришга мажбур бўлганини маълум қилган эди.

Жонли эфир давомида депутат Марказий Банк валюта айирбошлаш шаҳобчаларининг дам олиш кунлари ҳам ишлаши учун шарт-шароит яратмаганидан "қора бозор" ҳамон йўқолмаётгани ва ўзи дохил бошқа фуқаролар ҳам валютани ноқонуний йўл билан айирбошлаб, жиноятга қўл уришга мажбур бўлаётганини таъкидлаган.

30 ноябрь куни Адлия вазирлиги Кушербаевнинг жонли эфирдаги хатти-ҳаракатларини "қаттиқ қоралаб" чиққан.

"Биринчидан, Ўзбекистон Республикаси ҳудудида белгиланган юқоридаги қоидалар ва қонун талаблари кимгадир қулайлиги ёки қулай эмаслиги, ёқиши ёки ёқмаслиги, унинг фикридан, қарашларидан ва ижтимоий мақомидан ёхуд ҳафтанинг қайси куни эканлигидан қатъи назар бажарилиши мажбурийдир", дейилади расмий муносабатда.

Шунингдек, вазирлик депутатни қонун талабларига бўйсунмасликни тарғиб қилишда ҳам айблаган.

"…депутат Р.Кушербаев томонидан қонун билан жавобгарлик белгилаб қўйилган ҳуқуқбузарликни била туриб содир этиб, бу хатти-ҳаракатини кенг оммага намойишкорона маълум қилиниши жамиятни қонун устуворлиги томон эмас, тескари томонга чорлади, ноқулай пайтда қонунларни бузиш мумкин, ёқмайдиган талабларга кўз юмса бўлади, жавобгарликдан қўрқмайман деган энг нотўғри ва асоссиз сигнални жамиятимизга юборди".

Бироқ Адлия вазирлиги Кушербаев ҳаракатларига унинг депутатлик мақомини эътиборга олиб, фақат тегишли ваколатли орган ҳуқуқий баҳо беришга ҳақли экани, бу жараён амалга ошмагунча ҳеч ким уни қонунбузар деб эътироф этиш мумкин эмаслигини қўшимча қилган.

Алоқадор мавзулар:

3000 сўмлик экспресс автобус

Пойтахт Тошкентда 3 минг сўм эвазига шаҳарнинг бир бурчидан иккинчи четига 23 дақиқалик оралиқ интервал билан қатновчи экспресс автобус йўналишини ташкил этиш режалаштирилмоқда.

Тошкент шаҳар транспорт бошқармасининг хабар беришича, 20,5 километр масофалик ушбу йўналиш Чилонзор буюм бозори автошоҳбекатидан Юнусобод мавзеси 12-даҳа охирги бекатига қадар ҳаракатланади.

Автобуслар экспресс йўналиш бўйлаб 4 та жадвал асосида ҳаракатланиши хабар қилинмоқда.

Шаҳар транспорт бошқармаси, ҳозирча, янги экспресс автобус йўналиши қачон ишга туширилишига ойдинлик киритмаган.

Кўчатлар "томошаси"

Ижтимоий тармоқда дарахт кўчатларини экиш жараёни сохталаштирилаётгани тасвирланган видео қизғин муҳокамаларга сабаб бўлган.

Видеода бир неча инсонлар ўзларини кўчат экаётгандек тутиб, жараённи суратга тушираётгани кўзга ташланади.

"Қараб туринг - ҳозир ўзича расмга олволади, кейин кўчатни олиб кетади. Экмайди", дейди ҳолатни видеога туширган фуқаро.

Кейинроқ, ушбу ҳолат Наманган вилояти Поп туманида юз бергани маълум бўлган.

Туман ҳокимлиги 26 ноябрь куни Санг қишлоғи Боғ кўча маҳалла фуқаролари йиғини раиси бошчилигида кўчат экиш ишлари олиб борилгани ва жараёнга сохталик билан ёндашилгани аниқланганини билдирган.

Ҳокимлик бунинг ортидан маҳалла раиси дохил яна бир масъул эгаллаб турган лавозимидан озод қилинганини қўшимча қилган.

Эслатиб ўтиш жоиз, ноябрь ойи бошида президент Шавкат Мирзиёев томонидан "Долзарб 40 кунлик" кўчат экиш акцияси ташаббуси илгари сурилган.

Акция давомида автомобиль йўллари бўйи, аҳоли манзилгоҳларида ўн миллионлаб туп дарахт кўчатларини экиш режалаштирилган.

Яна чангли бўрон?

1-2 декабрь кунлари мамлакатнинг айрим ҳудудларида яна чангли бўрон кузатилиши мумкин.

Ўзгидромет тарқатган шошилинч хабарда Ўзбекистонга Туркманистон орқали Эрон ҳудудларидан 1-2 декабрь кунлари жуда илиқ ва қуруқ ҳаво кириб келиши кутилаётгани таъкидланган.

"1-2 декабрь кунлари ҳаво ҳароратининг кескин кўтарилиши фонида республика бўйича шамол 17-22 м/с гача кучайиши кутилмоқда, баъзи жойларда 25-28 м/с гача кучайиши мумкин, айрим вилоят ва туманларда чангли бўрон ҳамда чанг ғуборлари кўтарилиш кузатилиши мумкин", дейилади Ўзгидромет хабарида.

4-5 ноябрь куни мамлакатнинг қатор ҳудудлари, жумладан, пойтахт Тошкентда аномал қумли-чангли бўрон кузатилган, ҳавонинг ифлосланиш даражаси бир неча ўн баробарга ортиб кетгани хабар қилинган эди.

Довондаги "балиқ ёмғири"

Тармоқда Қамчиқ довони йўллари бўйлаб балиқлар сочилиб ётгани акс этган видео-суратлар тарқалган.

Видеолардан бирида довонда "балиқ ёмғири" ёғгани ҳақида сўз боради.

Бироқ Тошкент вилоят ҳокимлигининг аниқлик киритишича, ҳолатга йўл-транспорт ҳодисаси сабаб бўлган.

"Гап шундаки, довон йўлида ҳаракатланиб кетаётган хорижий корхонага тегишли енгил автомашина юкхонасида елим идишда боқиш учун етиштирилган балиқ чавоқлари олиб кетилаётган бўлган. Шу вақтда ҳаракат хавфсизлигини таъминлай олмаслик оқибатида енгил автомашинага жойлаштирилган елим идиш ёрилиб, ичидаги балиқлар йўлга сочилиб кетган", маълум қилган ҳокимлик.

Расмий хабарда 26 ноябрь куни содир бўлгани айтилган ушбу ҳодисада ҳеч ким жабр кўрмагани, балиқ чавоқларининг асосий қисми нобуд бўлмасидан йиғиштириб олингани қўшимча қилинган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek