Ўзбекистонда: Ётоқхонадаги ёнғинда 18 ишчи куйди, 1,5 миллион сўм пора учун 5 йил қамоқ жазоси ва газ таъминотини яхшилайдиган умидбахш лойиҳа – yangiliklar, O'zbekiston

  • Сергелидаги ишчилар ётоқхонасида ёнғин чиқди;
  • 1,5 миллион пора олган мактаб директори 5 йилга қамалди;
  • Чиноздаги ўнлаб йўл белгилари кулги остига олинди;
  • 6 вилоятда газ таъминотини яхшилайдиган магистраль қувур қурилмоқда;

Ётоқхонадаги ёнғин

29 ноябрь куни эрта тонгда Сергели туманидаги ётоқхонада ёнғин содир бўлиб, 18 инсон куйиш тан жароҳати олган.

Фавқулодда вазиятлар вазирлигининг хабар беришича, ёнғин хусусий корхоналардан бири ҳудудида жойлашган ишчилар ётоқхонасида келиб чиққан.

Бирламчи маълумотга кўра, ёнғинга газ қувурларининг носозлиги туфайли хонада газ тўпланиб қолиши сабаб бўлган.

Расмий хабарда воқеа жойида 43 нафар ишчи бўлгани айтилмоқда.

"…ёнғин оқибатида улардан 18 нафари ҳар хил турдаги куйиш тан жароҳати билан Республика шошилинч тиббий ёрдам илмий марказига жойлаштирилган. Ҳодиса оқибатида ҳалок бўлганлар йўқ", маълум қилган ФВВ.

Соғлиқни сақлаш вазирлиги жабрланганларнинг барчаси эркак киши бўлиб, уларнинг 10 нафари реанимация бўлимида даволанаётганини хабар қилган.

Алоқадор мавзулар:

1,5 миллион сўмлик пора

Китобда 1,5 миллион сўм пора олаётган вақт қўлга тушган мактаб директори 5 йилга озодликдан маҳрум қилинди.

Skip Энг кўп ўқилган and continue reading
Энг кўп ўқилган

End of Энг кўп ўқилган

Китоб тумани ҳокимлиги август ойида тумандаги 2-сонли Болалар ва ўсмирлар спорт мактаби директори пора олаётган вақтда қўлга олинганини хабар қилган эди.

Ўша вақтдаги хабарда директор спорт мураббийи лавозимига ишга киритиб қўйиш учун фуқародан пора олгани ҳақида сўз боради.

Эндиликда, туман ҳокимлигининг маълум қилишича, спорт мактабининг собиқ директори 5 йилга озодликдан маҳрум этилган.

Шунингдек, унга 2 йил муддатга мансабдорлик ва моддий жавобгарлик вазифаларида ишлаш ҳуқуқидан маҳрум этиш жазоси ҳам тайинланган.

120 метрда 20 та белги?

Ижтимоий тармоқда автомобиль йўли бўйлаб жуда қисқа масофада ўнлаб "Пиёдалар ўтиш жойи" белгилари ўрнатиб кетилгани акс этган видео тарқалган.

Видео муаллифлари бу йўл Чиноз туманида эканини айтиб, белгилар кўп ва палапартиш ўрнатилгани устидан куладилар.

Тармоқдаги муҳокамаларда фойдаланувчилардан "Арча эк дейишган бўлса, адашиб, йўл белгиларини ўрнатиб кетишган шекилли", дея ҳажв қилади.

Видеога ИИВ ЙҲХББ ҳам муносабат билдирган.

Расмий муносабатда видеода акс этган ҳолат Чиноз туманидаги ички йўллардан бири экани маълум қилинган.

"Мазкур йўл қурилиши давомида белгиларни ўрнатиш ишлари Тошкент вилояти ИИББ ЙҲХБ масъуллари билан келишилмаганлиги, бунинг натижасида белгилар нотўғри ўрнатилганлиги маълум бўлди", дейилади расмий муносабатда.

ИИВ ЙҲХББ ҳозирда ушбу хатолик бартараф этилаётганини қўшимча қилган.

Умидбахш газ қувури

Мамлакатнинг бир қанча ҳудудларидаги табиий газ таъминотини яхшилаши кутилаётган Газли-Когон магистраль газ қувурининг 4-тармоғи қурилмоқда.

Энергетика вазирлигининг маълум қилишича, узунлиги 140 километрга тенг ушбу тармоқ республиканинг марказий ва шарқий ҳудудлари - Жиззах, Сирдарё, Тошкент ва Фарғона водийсига газ етказиб беради.

Вазирлик иқтисодиёт тармоқларининг кенгайиши, саноат объектлари, янги турар жойларнинг қурилиши табиий газга бўлган талабнинг ортишига сабаб бўлаётгани, шу сабабдан, янги газ қувури бунёд этишга эҳтиёж пайдо бўлганини билдирган.

Хабар қилинишича, янги магистраль газ қувурининг ишга туширилиши ортидан суткасига қўшимча 25 миллион куб метр табиий газни мамлакат шимолидан жанубий қисмга ўтказиш имкони яратилади.

Энергетика вазирлиги бугунги кунга қадар объект бўйлаб 100 километрга яқин масофада қурилиш-монтаж ишлари бажарилганини қўшимча қилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek