شام میں امریکی بمباری سے درجنوں شہری ہلاک

انسانی حقوق کی ایک تنظیم سے وابستہ سرگرم کارکنوں کا کہنا ہے کہ شام کے جنوبی علاقوں میں امریکہ کی نگرانی میں دولتِ اسلامیہ کے ٹھکانوں ہونے والی بمباری میں 50 سے زیادہ شہری ہلاک ہوگئے ہیں۔

سیرین آبزرویٹری فار ہیومن رائٹس کے مطابق بِرمحل نامی گاؤں پر جمعے کو بمباری کی گئی اور کچھ لوگ اب تک ملبے تلے دبے ہوئے ہیں۔

اتحادی افواج کی جانب سے اس بارے میں تاحال کوئی بیان جاری نہیں کیا گیا ہے۔

اس سے پہلے سیرین آبزرویٹری کی جانب سے جاری کیے گئے ایک بیان میں کہا گیا تھا کہ اب تک اتحادی افواج کے فضائی حملوں میں 2 ہزار سے زیادہ افراد مارے جاچکے ہیں جن میں 1922 دولتِ اسلامیہ کے جنگجو بھی شامل ہیں۔

خبررساں ادارے اے ایف پی سے بات کرتے ہوئے سیرین آبزرویٹری کے سربراہ رامی عبدالرحمان کا کہنا تھا کہ ’جمعے کو اتحادی افواج کی جانب حلب صوبے میں واقع بِرمحل گاؤں پر کی جانے والی فضائی بمباری میں 52 شہری ہلاک ہوگئے ہیں۔‘

انسانی حقوق کی تنظیم کے مطابق مرنے والوں میں سات بچے بھی شامل ہیں اور 13 افراد تاحال لاپتہ ہیں۔

واضع رہے کہ اس گاؤں کے قریب دولتِ اسلامیہ اور کردوں کے مابین جھڑپیں جاری ہیں۔

شدت پسند دولتِ اسلامیہ شام اور عراق کے بڑے حصوں پر قابض ہے اور شامی افواج کے علاو دیگر باغی گروہوں کے ساتھ بھی اس کی جھڑپیں جاری ہیں۔

گزشتہ سال ستمبر میں امریکہ اور اس کے اتحادیوں نے دولتِ اسلامیہ کے خلاف فضائی حملوں میں اضافہ کیا ہے۔

شام میں دولتِ اسلامیہ کے ٹھکانوں پر بمباری کرنے والے ممالک میں کینیڈا، بحرین، سعودی عرب، اردن اور متحدہ عرب امارات شامل ہیں۔