منشیات لیےجانے والا ڈرون گر کر تباہ

امریکہ اور میکسیسکو کی سرحد کے قریب ایک منشیات سمگل کرنے والا ڈرون طیارہ گر کر تباہ ہو گیا۔

اس طیارے کے ذریعے تقریباً پونے تین کلو میتھافیٹامائن امریکہ سمگل کرنے کی کوشش کی جا رہی تھی۔

میکسیکو کی پولیس نے ٹیخوانا میں بتایا کہ انہیں اطلاع ملی کی ایک شاپنگ سینٹر کے کار پارک میں ایک عجیب شے گری ہوئی ملی ہے۔

اس ڈرون پر منشیات کو ٹیپ سے جوڑا گیا تھا جنہیں پلاسٹک کے لفافوں میں ڈال کر لگایا گیا تھا اور ان پر کرسٹل کے الفاظ لکھے ہوئے تھے۔

حکام نے اس بات کی تحقیقات شروع کر دی ہیں کہ اس ڈرون نے پرواز کہاں سے شروع کی اور اسے کون کنٹرول کر رہا تھا اور اسے کہاں لیےجایا جا رہا تھا۔

پولیس کا کہنا تھا کہ یہ پہلی بار نہیں ہے کہ ڈرون طیارے کو سرحد پار منشیات کی سمگلنگ کے لیے استعمال کیا گیا ہو۔

اپریل میں امریکی حکام نے جنوبی کیلی فورنیا میں ایک ڈرون کو ایک جیل کی باڑھ کے پاس دیکھا تھا جو موبائل فونز، جشیش اور سگریٹ جیل میں لے کر جا رہا تھا۔

اس سے قبل منشیات سمگل کرنے کے کے لیے منجنیق اور ہلکے طیاروں کے استعمال کی بھی کوششیں کی جا چکی ہیں۔

یاد رہے کہ امریکہ اور میکسیکو کی سرحد پر منشیات کی سمگلنگ ایک بہت بڑا مسئلہ ہے جس سے نمٹنے کے لیے دونوں حکومتیں کروڑوں ڈالر سالانہ خرچ کرتی ہیں۔