جوہری تجربات کا جرمانہ ایک ارب ڈالر

فرانس کے زیرِانتظام ایک خطے کی اسمبلی نے فرانس سے جوہری ٹیسٹ کے نتیجے میں پہنچنے والے نقصان پر زِرتلافی کے طور پر ایک ارب ڈالر ادا کرنے کا مطالبہ کیا ہے۔

ریڈیو نیوزی لینڈ انٹرنیشنل کے مطابق فرینچ پولینیشا کی اسمبلی نے 1966 سے 1996 کے دوران علاقے میں کیے جانے والے 193 جوہری تجربات کرنے پر پیرس سے 93 کروڑ ڈالر رقم ادا کرنے کا مطالبہ تیار کیا ہے۔

جزیرے میں حکمراں جماعت تاہوئرا ہورائترا نے فرانس سے آزادی کی مخالفت کی تھی۔

اس جماعت نے فرانس سے اضافی 13 کروڑ 20 لاکھ ڈالر ادا کرنے کا مطالبہ کیا ہے کیونکہ اس کے بقول اب بھی علاقے میں دو چھوٹے دائرہ نما جزیرے فرانس کے قبضے میں ہیں اور ان کی جلد واپسی ممکن نظر نہیں آ رہی ہے۔

فرینچ پولینیشا ایک سو سے زائد جزائر پر مشتمل خطہ ہے اور اس کی اپنی حکومت ہے لیکن یہ اب بھی جمہوریۂ فرانس کا حصہ ہے۔

1996 میں فرانس کی جانب سے جوہری تجربات ختم کرنے کے بعد پولینیشا کے سابق صدر گرسٹن فلوز نے علاقے کی ترقی کے لیے سالانہ 15 کروڑ ڈالر ادا کرنے پر بات چیت کی تھی۔

ریڈیو نیوزی لینڈ کے مطابق ایک ارب ڈالر کی رقم ادا کرنے کا مطالبہ خطے میں زیادہ توجہ حاصل نہیں کر سکا۔ موجودہ صدر ایڈورڈ فرِچ کے مطابق وہ اسمبلی کے مطالبے سے لاعلم ہیں اور پیرس سے رقم کے مطالبے کے منصوبے پر انھیں مایوسی ہوئی ہے۔