چلی: جنگل کی آگ سے 150 مکانات تباہ

جنوبی امریکی ملک چلی کے ساحلی شہر والپرائسو کے جنگلات میں لگنے والی آگ سے ڈیڑھ سو سے زیادہ مکانات تباہ ہوگئے ہیں جبکہ ہزاروں افراد سے شہر خالی کروایا جا رہا ہے تاکہ آگ کی لپٹ سے انھیں بچایا جا سکے۔

واضح رہے کہ بحرالکاہل کی جانب سے آنے والی تیز ہواؤں کے نتیجے میں شعلے بلند ہو رہے ہیں اور آگ کی تپش دور تک محسوس کی جا رہی ہے۔

چلی کی صدر میشیل بیچلیٹ نے شہر کو آفت زدہ قرار دینے کے بعد وہاں کے باشندوں کو شہر سے نکالنے کا کام فوج کے حوالے کر دیا ہے۔

یہ شہر سنیٹیاگو سے 110 کلومیٹر مغرب میں واقع ہے۔

دھوئیں سے لوگوں کو سانس لینے میں پریشانی ہو رہی ہے۔ شہر کے بڑے حصے میں بجلی کا نظام معطل ہے۔

شہر کے میئر جورجے کاسترو نے چلی کی قومی ٹیلی ویژن سے بات کرتے ہوئے کہا کہ ہزاروں شہریوں کے لیے پناہ گاہیں بنائی گئی ہیں جنھیں آتشزدگی کے نتیجے میں اپنا گھر بار چھوڑنا پڑا ہے۔

انھوں نے کہا: ’والپرائسو میں فی الحال بجلی نہیں ہے بڑھتی ہوئی یہ آگ بظاہر قابو سے باہر ہے۔‘

آگ پر قابو پانے کی کوشش بحرالکاہل سے آنے والی تیز ساحلی ہوا کے نتیجے میں متاثر ہوئی ہیں اور آگ شہر کے نواحی علاقوں میں داخل ہو چکی ہے۔

چلی کے ایمرجنسی آفیسر گوئلرمو دا لا مزا نے اخباری نمائندوں کو بتایا کہ ’موسم نے حالات کو پیچیدہ بنا دیا ہے۔ ہوا ہماری کوئی مدد نہیں کر رہی ہے۔ آگ پر قابو پانے کے ساتھ ساتھ شہر کو خالی کرانا ہماری ترجیحات میں شامل ہے۔‘