ایران سے معاہدہ: اوباما کی سعودی شاہ سے بات چیت

امریکی صدر براک اوباما نے اسرائیلی وزیراعظم کے بعد اب سعودی فرمانروا شاہ عبداللہ کو بھی ایران کے جوہری پروگرام کے بارے میں ہونے والے عبوری معاہدے کے حوالے سے اعتماد میں لیا ہے۔

وائٹ ہاؤس کا کہنا ہے کہ بدھ کو دونوں رہنماؤں کے درمیان امریکہ، برطانیہ، فرانس، چین، روس اور جرمنی کی طرف سے ایران کے جوہری پروگرام کے حوالے سے ایک جامع حل کی تلاش کی کوششوں، پر باقاعدگی سے صلاح مشورہ کرنے پر اتفاق ہوا۔

معاہدہ اہم مذاکرات کی بنیاد ثابت ہوگا

جنیوا میں اتوار کو ایران اور چھ عالمی طاقتوں کے مابین چھ ماہ کا ایک عبوری معاہدہ ہوا ہے جس کے تحت ایران نے اقتصادی پابندیوں میں نرمی کے بدلے اپنی کچھ جوہری سرگرمیوں کو کم کرنے اور معائنہ کاروں کو اپنی جوہری نصیبات تک رسائی پر اتفاق کیا ہے۔

ایران کا موقف ہے اس کا جوہری پروگرام ہتھیار بنانے کے لیے نہیں بلکہ پرامن مقاصد کے لیے ہے۔

وائٹ ہاؤس کا کہنا ہے کہ امریکی صدر اور سعودی شاہ کے درمیان ایران کی جانب سے کیے گئے وعدے پورے کرنے کی اہمیت زیرِ بحث آئی اور دونوں ممالک ان کوششوں کے سلسلے میں باقاعدگی سے بات چیت کرتے رہیں گے۔

سعودی عرب نے ابتدائی طور پر محتاط انداز میں عبوری جوہری معاہدے کا خیرمقدم کیا تھا اور کہا تھا کہ اگر نیت ٹھیک ہے تو یہ مسئلے کے حل کی جانب پہلا قدم ہے۔

خیال رہے کہ امریکی صدر نے اتوار کی شب اسرائیلی وزیر اعظم بنیامن نتن یاہو سے بھی ٹیلی فون پر بات چیت کی تھی جس میں براک اوباما نے انھیں بتایا تھا کہ وہ اسرائیل کے ساتھ فوری مشاورت شروع کرنا چاہتے ہیں تاکہ ایرانی جوہری عزائم کا جامع اور پائیدار حل تلاش کیا جاسکے۔

اسرائیلی وزیراعظم نے عالمی طاقتوں کے ایران کے ساتھ عبوری جوہری معاہدے کو ایک تاریخی غلطی قرار دیا تھا جبکہ امریکہ کا کہنا ہے کہ یہ معاہدہ نہ صرف اسرائیل بلکہ مشرق وسطیٰ کو مزید محفوظ خطہ بنائے گا۔

بنیامن نتن یاہو نے اپنے ردِ عمل میں کہا تھا کہ ’دنیا کی سب سے خطرناک قوم دنیا کے سب سے خطرناک ہتھیار کے حصول کی جانب اہم قدم اٹھانے میں کامیاب ہو گئی ہے۔‘ اور یہ کہ اسرائیل اس معاہدے کا پابند نہیں اور وہ اپنے دفاع کا حق محفوظ رکھتا ہے۔

ایران اور عالمی طاقتوں کے درمیان عبوری معاہدے کے اہم نکات مندرجہ ذیل ہیں۔