لائیو, ایرانی فوج کی علی لاریجانی کے قتل پر ’فیصلہ کُن‘ جوابی کارروائی کی دھمکی، تل ابیب پر ایرانی میزائل حملے میں دو افراد ہلاک

لائیو کوریج

1. 11 منٹ قبلانخلا کے احکامات کے بعد بیروت میں اسرائیلی فوج کی بمباری، چھ افراد ہلاک

   

   ،تصویر کا ذریعہAnadolu via Getty Images

   لبنان کے دارالحکومت بیروت کے ایک اور مرکزی مضافاتی علاقے میں اسرائیلی فضائی حملے کی مزید اطلاعات موصول ہو رہی ہیں۔

   ایک عینی شاہد نے خبر رساں ادارے رائٹرز کو بتایا کہ انھوں نے شہر کے بشورہ علاقے میں زور دار دھماکوں کی آوازیں سنیں یہ اس وقت ہوا جب اسرائیلی فوج نے ایک بیان جاری کر کے وہاں ایک عمارت کو خالی کرنے کی ہدایت دی تھی۔

   اسرائیل لبنان کے دارالحکومت بیروت میں حزب اللہ کے اہداف پر حملے کر رہا ہے، جہاں وزارتِ صحت کے مطابق کم از کم چھ افراد ہلاک اور 24 دیگر زخمی ہوئے ہیں۔

   بیان میں مزید کہا گیا کہ یہ اعداد و شمار ابتدائی ہیں اور متاثرین کی شناخت ’ڈی این اے ٹیسٹنگ کے بعد‘ کی جائے گی۔

   مقامی میڈیا نے پہلے رپورٹ کیا تھا کہ ایک حملہ مرکزی علاقے زقاق البلاط میں ایک رہائشی عمارت پر ہوا، جو سرکاری ہیڈکوارٹر اور متعدد سفارت خانوں کے قریب واقع ہے۔

   

   ،تصویر کا ذریعہGetty Images

   اے ایف پی کے مطابق ایک دوسرا حملہ بھی مرکزی بسطہ ضلع میں ہوا، جہاں عینی شاہدین نے کئی دھماکوں کی آوازیں سنیں۔

   واضح رہے کہ لبنان چند ہفتے قبل اس تنازع میں اس وقت شامل ہوا جب حزب اللہ، جو ایک لبنانی شیعہ مسلم سیاسی و عسکری گروہ ہے، نے ایران کے رہبرِ اعلیٰ کی ہلاکت اور اسرائیل کے بار بار حملوں کے ردِعمل میں اسرائیل پر راکٹ اور ڈرون حملے شروع کیے تھے۔

   

   ،تصویر کا ذریعہGetty Images

2. 37 منٹ قبلاسرائیل میں تازہ ایرانی میزائل حملے کے بعد کی صورتحال

   اسرائیل، تل ابیب پر ایرانی میزائل حملے کے بعد دو افراد ہلاک ہو گئے ہیں۔

   ایرانی میزائل حملے کے بعد تل ابیب سے موصول ہونے والی چند تصاویر

   

   ،تصویر کا ذریعہGetty Images

   

   ،تصویر کا ذریعہGetty Images

   

   ،تصویر کا ذریعہGetty Images

   

   ،تصویر کا ذریعہGetty Images

3. 43 منٹ قبلامریکہ اسرائیل اور ایران کے درمیان جنگ میں آج اب تک کیا ہوا ہے؟

   

   ،تصویر کا ذریعہGetty Images

   امریکہ اسرائیل اور ایران کے درمیان جنگ میں گذشتہ شب سے اب تک کیا ہوا ہے:

   • ایرانی سرکاری میڈیا نے سپریم نیشنل سکیورٹی کونسل کے سیکریٹری علی لاریجانی کی ایک فضائی حملے میں ہلاک تصدیق کی۔ لاریجانی، رہبرِ اعلیٰ علی خامنہ ای کے بعد ہلاک ہونے والے سب سے اعلیٰ ایرانی عہدیدار ہیں۔
   • ایران کے آرمی چیف نے لاریجانی کی ہلاکت کا بدلہ لینے کا عزم ظاہر کرتے ہوئے ’فیصلہ کن جواب‘ دینے کی دھمکی دی ہے۔ خبر رساں ادارے اے ایف پی کے مطابق ایران کی پاسدارانِ انقلاب کا کہنا ہے کہ اس نے لاریجانی کی موت کے ’بدلے‘ میں پہلے ہی وسطی اسرائیل پر میزائل داغ دیے ہیں۔
   • اسرائیل میں، تل ابیب پر ایرانی میزائل حملے کے بعد دو افراد ہلاک ہو گئے ہیں۔
   • اسرائیلی فوج لبنان بھر میں حزب اللہ کے اہداف پر حملے جاری رکھے ہوئے ہے۔ خبر رساں ادارے اے ایف پی کے مطابق لبنان کی وزارتِ صحت کے مطابق، وسطی بیروت پر اسرائیل کے دو حملوں میں کم از کم چھ افراد ہلاک اور 24 دیگر زخمی ہو گئے ہیں۔
   • اقوامِ متحدہ کی ایک ایجنسی کا کہنا ہے کہ ایرانی جوہری بجلی گھر کو بھی اس جانگ کے دوران حالیہ حملوں میں نشانہ بنایا گیا ہے، تاہم کوئی نقصان نہیں ہوا۔
   • امریکی فوج کا کہنا ہے کہ اس نے آبنائے ہرمز کے قریب ایرانی میزائل تنصیبات کو نشانہ بنایا ہے۔
   • ڈونلڈ ٹرمپ نے نیٹو اور دیگر اتحادیوں پر تنقید کی ہے اور دعویٰ کیا ہے کہ امریکہ کو ایران کی جنگ میں اب ان کی مدد کی ’نہ ضرورت ہے اور نہ خواہش،‘ تاہم اس سے قبل انھوں نے ان سے تعاون کی درخواست کی تھی۔

4. 58 منٹ قبلایرانی پروجیکٹائل سے آسٹریلیا کے فوجی اڈے کو نشانہ بنانے کی کوشش کی گئی ہے: آسٹریلوی وزیرِ اعظم

   

   ،تصویر کا ذریعہReuters

   آسٹریلیا کے وزیرِ اعظم کی جانب سے اس بات کی تصدیق کی گئی ہے کہ ایک ایران کی جانب سے داغے جانہ والا ایک میزائل متحدہ عرب امارات میں آسٹریلیا کے فوجی اڈے کے قریب گرا ہے۔

   وزیرِ اعظم انتھونی البانیزی نے کہا کہ یہ میزال ’آج یعنی بدھ کی صبح نو بج کر 15 منٹ پر متحدہ عرب امارات میں واقع المِنہاد اڈے پر گرا جہاں آسٹریلیا کی کی فوج موجود ہے۔‘

   انھوں نے مزید کہا کہ ’میں اس بات کی تصدیق کرتا ہوں کہ کوئی بھی آسٹریلوی اہلکار زخمی نہیں ہوا اور سب مکمل طور پر محفوظ ہیں۔‘

   انھوں نے یہ بھی بتایا کہ ’رہائشی بلاک اور طبی سہولت کے مرکز کو معمولی نوعیت کی آگ لگنے سے نقصان پہنچا ہے، یہ آگ اس وقت لگی جب یہ میزائل اڈے کی طرف جانے والی سڑک پر آ کر گرا۔‘

5. ایک گھنٹہ قبلبسیج کے کمانڈر غلام رضا سلیمانی کون تھے؟

   

   ،تصویر کا ذریعہGetty Images

   منگل کی شب پاسدارانِ انقلاب کی جانب سے اس بات کی تصدیق کی گئی کہ بسیج کے کمانڈر غلام رضا سلیمانی ایک اسرائیلی حملے میں ہلاک ہوئے۔

   غلام رضا سلیمانی پاسدارانِ انقلاب کے اعلیٰ عہدیداروں میں شمار ہوتے تھے۔ متعدد فوجی کمانڈروں کی ہلاکت کے بعد جن میں ایران پر امریکہ اور اسرائیل کے حملوں کے پہلے دن کمانڈر اِن چیف کی ہلاکت بھی شامل ہے سلیمانی کی موت جنگ کی اہم خبروں میں سے ایک ہے۔

   بسیج جو تنظیمی طور پر پاسدارانِ انقلاب کے ماتحت ہے ایران کی حکومتی سکیورٹی قوتوں میں سے ایک ہے اور داخلی مسائل کے انتظام، نیز احتجاج کو دبانے اور کنٹرول کرنے میں اہم کردار ادا کرتی ہے۔

   غلام رضا سلیمانی کون تھے؟

   سپاہ نیوز کی ویب سائٹ نے ان کی بسیج کے کمانڈر کے طور پر تقرری کے وقت ان کے پس منظر پر ایک رپورٹ شائع کی تھی۔

   اس رپورٹ کے مطابق، وہ سن 1964 میں صوبہ چهارمحال و بختیاری کے شہر فارسان میں پیدا ہوئے۔

   اپنی تقرری کے وقت وہ تاریخ میں پی ایچ ڈی کے طالب علم تھے اور ان کا مقالہ ’دورِ اسلام میں ایران کی تاریخ‘ کے موضوع پر تھا، جبکہ انھوں نے کمانڈ اور سٹاف کے کورسز بھی مکمل کیے تھے۔

   

   ،تصویر کا ذریعہGetty Images

   غلام رضا سلیمانی سن 1988 میں بسیج میں شامل ہوئے اور ایران عراق جنگ کے دوران درجنوں آپریشنز میں حصہ لیا، جن میں فتح المبین، بیت المقدس، رمضان، محرم اور خیبر شامل ہیں، جہاں انھوں نے بسیج کے کمپنی کمانڈر اور بٹالین کمانڈر کے طور پر خدمات انجام دیں۔

   انھوں نے فوجی درجہ بندی میں ترقی کی اور 44 قمر بنی ہاشم بریگیڈ، 57 ابوالفضل بریگیڈ کے کمانڈر رہے اور بیک وقت لرستان ریجن کے کمانڈر بھی رہے۔ اس کے علاوہ وہ 19 فجر ڈویژن، قرارگاہ قدس، 41 ثارالله ڈویژن اور 41 امام حسین ڈویژن کے بھی کمانڈر رہے۔

6. 2 گھنٹے قبلایرانی فوج کے سربراہ کی علی لاریجانی کے قتل پر ’فیصلہ کُن‘ جوابی کارروائی کی دھمکی

   

   ،تصویر کا ذریعہAnadolu via Getty Images

   ایرانی فوج کے سربراہ امیر حاتمی نے سکیورٹی چیف علی لاریجانی کی اسرائیلی فضائی حملے میں ہلاکت کے بعد ’فیصلہ کن‘ جوابی کارروائی کی دھمکی دی ہے۔

   حاتمی نے ایک بیان میں کہا کہ ’مناسب وقت اور جگہ پر امریکہ اور خونخوار صیہونی حکومت کو ایک فیصلہ کن اور انتہائی شدید جواب دیا جائے گا۔‘

   انھوں نے مزید کہا کہ لاریجانی اور دیگر ’شہدا‘ کی موت کا بدلہ ہر قیمت پر لیا جائے گا۔

   خبر رساں ادارے اے ایف پی کے مطابق ایرانی پاسدارانِ انقلاب نے کہا ہے کہ وہ لاریجانی کی موت کے ’بدلے‘ میں مرکزی اسرائیل پر پہلے ہی میزائل داغ چکی ہے۔

7. 2 گھنٹے قبلایک پروجیکٹائل نے ایرانی جوہری بجلی گھر کو نشانہ بنایا ہے: اقوامِ متحدہ

   بین الاقوامی ایٹمی توانائی ایجنسی کا کہنا ہے کہ ایران نے اطلاع دی ہے کہ ملک کے جنوب مغرب میں ایک جوہری بجلی گھر کو ایک پروجیکٹائل سے نشانہ بنایا گیا ہے۔

   ایک بیان میں آئی اے ای اے جو جوہری ٹیکنالوجیز کی نگرانی کرنے والا اقوامِ متحدہ کا ادارہ ہے نے کہا کہ ایران نے منگل کی شام بوشہر جوہری بجلی گھر میں پیش آنے والے واقعے کی اطلاع دی۔

   بیان میں کہا گیا کہ ’بجلی گھر کو کوئی نقصان نہیں پہنچا اور نہ ہی عملے کے زخمی ہونے کی اطلاع ہے۔‘

   بین الاقوامی ایٹمی توانائی ایجنسی کے ڈائریکٹر جنرل رافیل گروسی نے تنازع کے دوران زیادہ سے زیادہ تحمل کی اپیل دہرائی ہے تاکہ جوہری ہتھیاروں کے خطرے سے بچا جا سکے۔

8. 2 گھنٹے قبلبغداد میں امریکی سفارتخانے پر تازہ حملہ

   

   ،تصویر کا ذریعہReuters

   خبر رساں اداروں کی جانب سے عراقی دارالحکومت میں امریکی سفارت خانے کے کمپاؤنڈ پر نئے حملوں کی اطلاعات سامنے آرہی ہیں۔

   خبر رساں اداروں اے ایف پی اور رائٹرز نے بدھ کی صبح دھماکوں کے حوالے سے خرب دی ہے۔

   اداروں نے سکیورٹی ذرائع کا حوالہ دیتے ہوئے بتایا کہ اے ایف پی کے صحافیوں نے شہر میں سفارت خانے کے قریب دھماکوں کی آوازیں سنیں۔ یہ علاقہ سخت سکیورٹی والے گرین زون میں واقع ہے، جہاں کئی سفارتی مشنز اور بین الاقوامی تنظیمیں موجود ہیں۔

9. 2 گھنٹے قبلسعودی عرب اور کویت پر ڈرون اور میزائل حملوں کا سلسلہ جاری

   سعودی عرب اور کویت دونوں ہی مُمالک کی جانب سے جاری بیانات میں کہا گیا ہے کہ وہ اپنے علاقے میں ہونے والے متعدد ڈرون اور میزائل حملوں کا جواب دے رہے ہیں۔

   سعودی وزارتِ دفاع کا کہنا ہے کہ اس نے ملک کے مشرقی حصے میں چھ ڈرونز ناکارہ بنایا اور انھیں فضا میں ہی تباہ کر دیا۔

   دوسری جانب، کویت کی فوج کا کہنا ہے کہ اُن کے فضائی دفاعی نظام ’میزائل اور ڈرونز‘ کا مقابلہ کر رہے ہیں اور عوام سے کہا گیا ہے کہ وہ حفاظت اور سکیورٹی سے متعلق ہدایات پر عمل کریں۔

   مزید کہا گیا ہے کہ ’جو بھی دھماکوں کی آوازیں سنی جا سکتی ہیں‘ وہ دراصل فضائی دفاعی نظام کی جانب سے حملوں کو روکنے کا نتیجہ ہیں۔

10. 2 گھنٹے قبلتل ابیب میں ایرانی میزائل حملے میں دو افراد ہلاک

    

    ،تصویر کا ذریعہGetty Images

    مقامی پولیس کا کہنا ہے کہ ایران کی جانب سے میزائل حملے میں تل ابیب کے اردگرد متعدد مقامات کو نشانہ بنایا گیا ہے جس میں دو افراد ہلاک ہو گئے۔

    اسرائیلی ایمبولینس سروس ماگن ڈیوڈ ادوم کے ایک ایمرجنسی ریسپانڈر نے خبر رساں ادارے اے ایف پی کو بتایا کہ انھوں نے ایک عمارت سے ’اٹھتا ہوا دھواں‘ اور ’وسیع پیمانے پر تباہی دیکھی ہے۔

    بعد ازاں طبی عملے نے تل ابیب کے مشرق میں رامات گان کے علاقے میں ایک مرد اور ایک خاتون کی موت کی تصدیق کی، جنھیں ’شریپنل لگنے سے گہرے‘ آئے تھے۔

    بنی براق کے علاقے میں، ایم ڈی اے ٹیموں نے ایک اور زخمی شخص کو ہسپتال منتقل کیا۔

11. 2 گھنٹے قبلامریکی افواج کا آبنائے ہرمز کے قریب ایرانی میزائل تنصیبات پر اور ٹھکانوں پر حملہ

    امریکہ کا کہنا ہے کہ اس نے 5000 پاؤنڈ وزنی متعدد گہری ضرب لگانے والے بموں کو ایران کے ’مضبوط‘ میزائل ٹھکانوں پر ’کامیابی سے استعمال‘ کیا ہے۔

    امریکی سینٹرل کمانڈ نے ایک سوشل میڈیا پوسٹ میں کہا کہ یہ بم ایران کے ساحلی علاقے میں آبنائے ہرمز کے قریب اہداف پر گرائے گئے ہیں۔

12. 2 گھنٹے قبل’جشن منائیں، ہم اوپر سے دیکھ رہے ہیں: نیتن یاہو کا ایرانی عوام کے لیے ویڈیو پیغام

    

    ،تصویر کا ذریعہReuters

    اسرائیل کے وزیرِ اعظم نے ایک ویڈیو جاری کی ہے جس میں وہ فوجی کمانڈروں کے درمیان کھڑے ہو کر ایرانی عوام کے لیے پیغام دے رہے ہیں۔

    بنیامین نیتن یاہو کا کہنا تھا کہ ’میں یہاں اسرائیل کے وزیرِ دفاع، ہمارے چیف آف سٹاف، موساد کے سربراہ، فضائیہ کے سربراہ اور ہمارے سینیئر کمانڈروں کے ساتھ موجود ہوں۔‘

    انھوں نے کہا کہ ’گذشتہ 24 گھنٹوں میں ہم نے اس جابرانہ حکومت کے دو بڑے دہشت گرد سرغنوں کو ختم کر دیا ہے۔‘

    واضح رہے کہ اب ایران نے سکیورٹی چیف علی لاریجانی اور بسیج ملیشیا کے سربراہ غلام رضا سلیمانی کی ہلاکت کی تصدیق کر دی ہے، جس کا اعلان اسرائیل نے پہلے ہی کر دیا تھا۔

    نیتن یاہو نے مزید کہا کہ ’ہمارے طیارے دہشت گرد عناصر کو میدانوں میں، چوراہوں پر اور شہر کے مرکزی مقامات پر نشانہ بنا رہے ہیں۔‘

    اس کے بعد وہ جمعے کو آنے والے ایرانی نئے سال نوروز کے حوالے سے پیغام دیا کہ ’یہ سب اس لیے ہے کہ ایران کے بہادر لوگ جشنِ آتش (چہارشنبہ سوری) منا سکیں۔ تو جشن منائیں اور نوروز مبارک۔ ہم اوپر سے دیکھ رہے ہیں۔‘

13. 2 گھنٹے قبلایران نے سکیورٹی چیف علی لاریجانی کی ہلاکت کی تصدیق کر دی

    

    ،تصویر کا ذریعہGetty Images

    ایران کی سپریم نیشنل سکیورٹی کونسل کے سیکرٹریٹ نے کونسل کے سیکرٹری علی لاریجانی کے ’قتل‘ کی تصدیق کر دی ہے۔

    تنظیم نے ایک بیان میں کہا ہے کہ علی لاریجانی ان کے بیٹے مرتضیٰ لاریجانی، کونسل کے ڈپٹی سیکورٹی آفیسر علی رضا بیات اور محافظوں کے ایک گروپ کے ساتھ مارے گئے۔

    اسرائیلی میڈیا میں دعویٰ کیا جا رہا ہے کہ علی لاریجانی پر حملہ اس وقت کیا گیا جب وہ اپنے بیٹے کے ساتھ ایک خفیہ اپارٹمنٹ میں چھپے لیے ہوئے تھے۔

    قبل ازیں اسرائیلی حکام نے اعلان کیا تھا کہ سپریم نیشنل سیکیورٹی کونسل کے سیکریٹری علی لاریجانی اور بسیج کے کمانڈر غلام رضا سلیمانی کو ہلاک کردیا گیا ہے۔

14. 3 گھنٹے قبلگذشتہ روز کی اہم خبروں کا خلاصہ

    آج کے دن میں آگے بڑھنے سے پہلے آئیے گذشتہ روز کی چند اہم خبروں پر ایک نظر ڈالتے ہیں

    • منگل کے روز ایران کی پاسداران انقلاب نے بسیج ملیشیا کے کمانڈر غلام رضا سلیمانی کی موت کی تصدیق کی۔ جاری کردہ بیان میں کہا گیا کہ یہ ’بزدلانہ قتل‘ اُن کی امریکہ اور اسرائیل کے خلاف ’جنگ‘ میں بسیج کی ’اہمیت اور کردار‘ کو ظاہر کرتا ہے۔
    • امریکی صدر ڈونلڈ ٹرمپ نے گذشتہ روز کہا کہ اکثر نیٹو اتحادی ممالک کی طرف سے امریکہ کو کہا گیا ہے کہ وہ ایران کے خلاف فوجی کارروائیوں میں حصہ لینا نہیں چاہتے۔ ٹروتھ سوشل پر ایک پیغام میں ٹرمپ کا کہنا تھا کہ ’چونکہ ہمیں اس قدر عسکری کامیابی ملی ہے، ہمیں نیٹو ممالک کی مدد کی ضرورت نہیں اور نہ ہی ہمیں اس کی خواہش ہے۔ ہمیں کبھی ان کی ضرورت نہیں تھی۔‘
    • امریکہ کے انسداد دہشت گردی سینٹر کے ڈائریکٹر جو کینٹ نے ایران کے خلاف حملے پر احتجاجا مستعفی ہونے کا اعلان کر دیا ہے۔ سوشل میڈیا پر اپنے استعفے کے اعلان میں جو کینٹ نے کہا کہ ’اپنے ضمیر کے خلاف جا کر ایران میں جاری جنگ کی حمایت نہیں کر سکتا۔‘
    • اقوامِ متحدہ کے تحقیق کار ایران میں میناب کے اس سکول کے مقام تک رسائی حاصل کرنے کی کوشش کر رہے ہیں جس پر جنگ کے آغاز میں حملہ کیا گیا تھا۔ اقوامِ متحدہ کے ایران فیکٹ فائنڈنگ مشن کے ایک رکن کے مطابق ادارے کے پاس معتبر اطلاعات ہیں کہ اس حملے میں کم از کم 168 افراد ہلاک ہوئے، جن میں اکثریت طالبات کی تھی جن میں سے کئی سات سال کی عمر کی بھی تھیں۔

15. 3 گھنٹے قبلبی بی سی کے لائیو پیج میں خوش آمدید!

    بی بی سی کے لائیو پیج میں خوش آمدید۔ پاکستان سمیت دنیا بھر کی اہم خبروں اور تجزیوں سے متعلق جاننے کے لیے بی بی سی کی لائیو پیج کوریج جاری ہے۔

    گذشتہ روز تک کی خبریں جاننے کے لیے یہاں کلک کریں۔