’شمالی کوریائی جہاز پر موجود اسلحہ کیوبا کا تھا‘
کیوبا نے پاناما میں روکے گئے شمالی کوریا کے بحری جہاز میں اپنے فوجی سازو سامان کی موجودگی کی تصدیق کر دی ہے۔
کیوبا کی وزارتِ خارجہ نے کہا ہے کہ شمالی کوریا کا یہ بحری جہاز فرسودہ فوجی سازو سامان مرمت کے لیے کیوبا سے شمالی کوریا لے کر جا رہا تھا۔
گزشتہ ہفتے پاناما میں روکے جانے والے شمالی کوریا کے جہاز میں چینی کے ساتھ خفیہ طور پر غیر اعلان شدہ فوجی سازوسامان ملا تھا۔
کیوبا کے وزارتِ خارجہ نے اپنے بیان میں بین الااقوامی قوانین کا احترام اور امن کے قیام کے لیے جوہری عدم پھیلاؤ سمیت تخفیفِ اسلحہ کے لیے اپنا کردار ادا کرنے کی یقین دہانی کروائی ہے۔
بیان میں کہا گیا ہے کہ جہاز میں 240 ٹن فرسودہ دفاعی سامان موجود ہے جس میں دو اینٹی میزائل کمپلیکس، نو میزائلوں کے پُرزے اور لڑاکا جہازوں کے پرزے شامل ہیں۔
کیوبا کی حکومت کی جانب سے جاری ہونے والے بیان میں کہا گیا ہے کہ دفاعی سازوسامان بہت پرانا ہے جو مرمت کے بعد کیوبا کو واپس کیا جائے گا۔
پاناما کے صدر ریکارڈو مارٹنیلی نے مقامی ذرائع ابلاغ کو بتایا کہ شمالی کوریا کا بحری جہاز کیوبا سے آ رہا تھا۔ انہوں نے کہا کہ اس جہاز میں مشتبہ ’جدید میزائل کے پرزے‘ تھے۔
پاناما کے صدر نے اپنے ٹوئٹر اکاؤنٹ پر ایک تصویر شائع کی ہے جس میں ساز و سامان میں سبز رنگ کی ایک شے پڑی ہوئی ہے۔
End of سب سے زیادہ پڑھی جانے والی
صدر ریکارڈو کا کہنا ہے کہ جہاز کیوبا سے پاناما کینال کی جانب جا رہا تھا اور اس کو مزید پوچھ گچھ کے لیے روکا گیا ہے۔
’ہم جہاز میں سے چیزیں اتاریں گے اور معلوم کرنے کی کوشش کریں گے کہ اس ساز و سامان میں کیا تھا۔‘
پاناما کے صدر کے مطابق اس جہاز کے عملے کو حراست میں لے لیا گیا ہے بشمول کپتان کے جس نے اپنے آپ کو مارنے کی کوشش بھی کی۔
پاناما کے سینیئر وزیر کا کہنا ہے کہ سکیورٹی حکام کو اس وقت شک پڑا جب جہاز کے کپتان اور عملے نے پرتشدد ردِعمل دکھایا۔
واضح رہے کہ اقوام متحدہ کی جانب سے شمالی کوریا پر ہتھیاروں کی درآمد اور برآمد پر پابندیاں عائد ہیں۔
ان پابندیوں کو اس وقت مزید سخت کردیا گیا جب شمالی کوریا نے تیسرا ایٹمی تجربہ کیا۔ ان پابندیوں میں ممالک کو اس بات کا حق دیا گیا ہے کہ وہ شمالی کوریا کے جہازوں کو روک کر تلاشی لے سکتے ہیں۔
حالیہ برسوں میں شمالی کوریا کے کئی جہازوں کو روک کر تلاشی لی گئی ہے۔
