سیاحت کا فروغ: ہانگ کانگ کی حکومت سیاحوں میں 5 لاکھ ایئر ٹکٹ مفت بانٹے گی
،تصویر کا ذریعہGetty Images
ہانگ کانگ کی حکومت کا کہنا ہے کہ وہ اپنے ملک میں سیاحت کے فروغ کے لیے دنیا بھر کے شہریوں میں پانچ لاکھ ایئرلائن ٹکٹس مفت بانٹے گی۔ ان ٹکٹوں کی مالیت 254.8 ملین ڈالر بتائی جا رہی ہے۔
یاد رہے کہ ہانگ کانگ کی سیاحت کے شعبے کو کورونا کی وجہ سے عائد پابندیوں کی وجہ سے کافی نقصان پہنچا ہے اور اب پابندیوں کے خاتمے کے بعد یہاں کی حکومت سیاحت کو بحال کرنے کی کوششیں کر رہی ہے۔
چونکہ ہانگ کانگ آنے والے سیاحوں کی تعداد میں بڑی کمی واقع ہوئی ہے اس لیے مختلف ایئرلائنز کوشاں ہیں کہ وہ ہانگ کانگ کے لیے اپنے آپریشنز یا فلائیٹس جاری رکھ پائیں۔
دوسری جانب گذشتہ روز یعنی بدھ کو برطانیہ کی ایئر لائن ’ورجن اٹلانٹک‘ کی انتظامیہ نے اعلان کیا کہ وہ یوکرین جنگ کے باعث پیش آنے والے مسائل کے باعث ہانگ کانگ کے لیے اپنا فلائیٹ آپریشن روک رہے ہیں۔
ہانگ کانگ ٹورازم بورڈ کے ایگزیکیٹیو ڈائریکٹر ژین چینگ نے بتایا کہ ’ہانگ کانگ کی ایئرپورٹ اتھارٹی ایئرلائن کمپنیوں کے ساتھ اس حوالے سے انتظامات کو حتمی شکل دے گی۔ حکومت کی جانب سے فائنل اعلان کے بعد ہم مفت ہوائی ٹکٹوں کے لیے اشتہاری مہم شروع کریں گے۔‘ ڈین چینگ، ایگزیکٹو ڈائریکٹر۔ ہانگ کانگ ٹورازم بورڈ نے کہا۔
یہ بھی پڑھیے
End of سب سے زیادہ پڑھی جانے والی
انھوں نے بتایا کہ درحقیقت یہ ٹکٹ ہانگ کانگ کی حکومت نے مختلف ایئرلائنز سے کورونا کی وبا کے دوران خریدے تھے اور اس کا مقصد ایئرلائنز کے نقصانات کو کورونا کی وجہ سے کم سے کم کرنا تھا تاکہ وہ ہانک کانگ کے لیے اپنے فلائیٹ آپریشنز جاری رکھ سکیں۔
انھوں نے کہا اب یہی ٹکٹ لوگوں میں مفت بانٹ دیے جائیں گے۔
،تصویر کا ذریعہGetty Images
دریں اثنا ورجن اٹلانٹک نے اعلان کیا ہے کہ وہ ہانگ کانگ میں اپنا آفس بند کر دیں گے اور لندن سے ہانگ کانگ تک کے فلائٹس آپریشنز 30 برس جاری رہنے کے بعد بند کرنے جا رہے ہیں۔
یوکرین پر روسی قبصے کی وجہ سے بہت سی ایئر لائنز نے اپنی فلائٹس مختلف ممالک کے لیے منسوخ کی ہیں کیونکہ جنگ کی وجہ سے ایئرلانز کو طویل فضائی راستے طے کرنے پڑ رہے ہیں کیونکہ جنگ زدہ علاقوں کی فضائی حدود بند ہیں۔
ورجن ایئرلائن کا کہنا ہے کہ وہ اپنے وفادار گاہکوں کو اس روٹ یا کسی اور روٹ پر بندش کے باعث ہونے والی مایوسی پر معذرت خواہ ہیں، اور ان تمام صارفین کو ان کی رقوم واپس کر دی جائیں گی جو انھوں نے ٹکٹوں کی پری بکنگ کی مد میں جمع کروا رکھی ہیں یا پھر کسی متبادل ورجن اٹلانٹک روٹ پر دوبارہ بکنگ کرنے کی پیشکش کی جائے گی۔
رواں برس میں پہلے آٹھ ماہ کے دوران ہانگ کانگ کا سفر کرنے والوں کی تعداد ایک لاکھ چوراسی ہزار تھی۔ یہ اعداد و شمار کورونا کی وبا سے پہلے ہانگ کانگ آنے والے سیاحوں کی تعداد میں نمایاں کمی ظاہر کرتے ہیں، سنہ 2019 کے ڈیٹا پر نظر ڈالیں تو اس سال پانچ لاکھ ساٹھ ہزار ساح ہانگ کانگ شہر میں گئے تھے۔
