کووڈ: ایک جائزے کے مطابق بخار کی جگہ اب گلے میں خراش کورونا وائرس کی ’سب سے عام‘ علامت

سترہ ہزار پانچ سو لوگوں سے لیے گئے اعداد و شمار کے مطابق گلے کی سوزش کووِڈ کی سب سے بڑی علامت ہو سکتی ہے۔ حال ہی میں کووڈ سے متاثرہ لوگوں نے اس علامت کی سب سے زیادہ نشاندہی کی ہے۔

دیگر سب سے عام علامات میں سر درد، بند ناک اور کھانسی ہیں۔

تیز بخار، سونگھنے یا ذائقے کی حِس میں کمی، جنھیں برطانیہ کا صحت عامہ کا ادارہ این ایچ ایس ممکنہ طور پر کووڈ علامات کے طور پر سرِ فہرست رکھتا ہے، اب زیادہ عام نہیں رہے۔

بھاری آواز، چھینکیں، تھکاوٹ، پٹھوں میں درد اور چکر آنا جیسی علامتیں اب زیادہ ہیں۔

زو ایپ سٹڈی کے اعداد و شمار کے مطابق کووڈ کی 20 سب سے زیادہ عام علامات یہ ہیں:

'ریئل ٹائم اسسمنٹ آف کمیونٹی ٹرانسمیشن' یعنی 'ری ایکٹ ون' جائزے کے تحت ہر ماہ پورے انگلینڈ میں ڈیڑھ لاکھ سے زیادہ لوگوں کو گھر پر سواب ٹیسٹ بھیجے جا رہے ہیں۔

اس سے حاصل کردہ نتائج سے پتا چلتا ہے کہ جیسے جیسے وقت گزر رہا ہے، کووڈ سے متاثرہ لوگوں کی علامات میں تبدیلی آئی ہے۔

سائنسدانوں کا خیال ہے کہ یہ اس بات پر منحصر ہو سکتا ہے کہ وائرس یا اس کی شکل وقت کے ساتھ کس طرح بدل رہی ہے۔

ووہان سے نکلنے والے اصل وائرس کے بعد سے کووڈ کی مختلف شکلیں یا ویریئنٹ سامنے آئے ہیں، جن میں تازہ ترین اومیکرون ہے۔

امپیریل کالج لندن کے ری ایکٹ ون کے محققین کا کہنا ہے کہ سونگھنے اور ذائقے کی حس ختم ہو جانا اومیکرون کے ساتھ کم عام دکھائی دیتا تھا۔ جبکہ اب لوگ زیادہ سردی اور فلو جیسی علامات کی اطلاع دے رہے ہیں۔

یہ بھی پڑھیے

کیا کووڈ کے نئے ویرینٹ اینٹی باڈیز کو دھوکہ دے رہے ہیں؟

کورونا: ویکسین لگوانے اور نہ لگوانے والے افراد میں اس بیماری کی علامات کس قدر مختلف ہیں؟

اومیکرون کی علامات کیا ہیں اور اس سے بچاؤ کا بہترین طریقہ کیا ہے؟

اگر کسی جاننے والے کو کووڈ ہوا ہو تو اس سے کتنے دن بعد ملنا محفوظ ہے؟

انھوں نے اومیکرون کا جائزہ لیا، جسے بی اے ون اور بی اے ٹو کہا جاتا ہے۔ یہ مارچ 2022 میں پھیل رہا تھا۔

اس کے بعد سے اومیکرون کی دو نئی اقسام پھیلنا شروع ہوئیں جنھیں بی اے فور اور بی اے فائیو کہتے ہیں۔ اس سے مزید لوگ بیمار ہو رہے ہیں۔

ایک اندازے کے مطابق برطانیہ میں دو کروڑ ستر لاکھ افراد کے بارے میں خیال کیا جاتا ہے کہ انھیں کووڈ ہو چکا ہے۔ پروفیسر ٹم سپیکٹر، جو زو ہیلتھ سٹڈی چلاتے ہیں، کا کہنا ہے ’لوگوں میں کووِڈ اب بھی پھیل رہا ہے۔‘

’یہاں تک کہ وہ لوگ بھی اس کی گرفت میں آ رہے ہیں جنھیں پہلے کووڈ ہو چکا ہے اور وہ ویکسین بھی لگوا چکے ہیں۔‘

ان کا کہنا ہے کہ ’اگرچہ ہم سب برطانیہ میں موسمِ گرما کا زیادہ سے زیادہ لطف اٹھانا چاہتے ہیں، لیکن لوگوں کو خود فیصلہ کرنا ہوگا کہ آیا بڑے پُرہجوم مقامات پر جانا، دفتر سے کام کرنا یا پُرہجوم پبلک ٹرانسپورٹ استعمال کرنا خطرناک ہو سکتا ہے یا نہیں۔‘

زو سٹڈی اور ری ایکٹ ون سٹڈی دونوں کو حال ہی میں حکومت کی جانب سے مالی اعانت فراہم کی گئی تھی۔