فرانس: کتا زیادہ بھونکا تو مالک کو جرمانہ ہو گا
،تصویر کا ذریعہGetty Images
شمالی فرانس کے ایک قصبے میں میئر نے کتوں کے غیر ضروری طور پر بھونکنے پر پابندی عائد کر دی ہے۔
اب فیکوریس نامی قصبے میں کتوں کے غیر ضروری اور بار بار بھونکنے کی صورت میں مالک کو 68 یورو جرمانہ ادا کرنا ہو گا۔
میئر جین پائری ایسٹنی کا کہنا ہے کہ دن رات کتوں کے بھونکنے سے علاقے میں ایک ناقابل برداشت صورتحال پیدا ہو رہی ہے اور یہ اقدام صوتی آلودگی پر قابو پانے کے لیے اٹھایا گیا ہے۔
تاہم جانوروں کے حقوق کے لیے سرگرم افراد کی جانب سے اس اقدام کی شدید مذمت کی گئی ہے۔
ایک فرانسیسی اخبار سے بات کرتے ہوئے جین پائری ایسٹنی نے کہا کہ ان کا مقصد علاقے میں کتوں پر پابندی لگانا یا ذرا سے شور پر لوگوں کو جرمانہ کرنا نہیں ہے۔
’یہ قصبہ کتوں کے خلاف نہیں ہے لیکن جب آپ انھیں پالنے کا فیصلہ کرتے ہیں تو ان کی تربیت بھی کریں۔‘
یہ بھی پڑھیے:
End of سب سے زیادہ پڑھی جانے والی
اس ماہ کے شروع میں مقامی کونسل کی منظوری سے جاری کیے گئے حکم نامے کے مطابق مالک کے کسی قریبی دکان میں جانے کی صورت میں کتوں کو بند جگہوں میں چھوڑ کر جانے سے بھی منع کیا گیا ہے۔
حتیٰ کہ ییپی کتوں کو بھی اندر رکھنے کی ہدایت کی گئی ہے، اگر ان کا رویہ فیکوریس میں مقیم 1400 رہائشیوں میں سے کسی کے آرام میں خلل کا باعث بنتا ہے۔
ہر شکایت کی صورت میں کتے کے مالک کو جرمانہ ادا کرنا ہو گا۔
،تصویر کا ذریعہGetty Images
یہ حکم نامہ ایک رہائشی عورت کے خلاف گاؤں والوں کی شکایت کے بعد آیا ہے۔
ایسٹنی کا کہنا ہے کہ اس کے پاس بہت سے کتے ہیں اور کچھ بہت بڑے ہیں۔ ہم نے اس کے ساتھ بات چیت کرنے کی بہت کوشش کی ہے لیکن کوئی فائدہ نہیں ہوا۔
ان کا کہنا ہے کہ اگر میں نے یہ فیصلہ کیا ہے تو اس کی وجہ یہ ہے کہ ہمیں کوئی اور راستہ نہیں ملا اور میں فارغ نہیں بیٹھ سکتا۔
ایسوسی ایشن فاردی ڈیفینس آف اینیمل رائٹس کے صدر سٹیفن لامارٹ نے اس اقدام کی مذمت کرتے ہوئے اسے ’مکمل بکواس` قرار دیا ہے۔
لامارٹ نے ایک اخبار سے بات کرتے ہوئے کہا کہ آپ اتوار کی صبح چرچ میں بجنے والی گھنٹیوں پر بھی پابندی عائد کر دیں۔
’اگر کتوں کے منہ ہیں، تو وہ اس لیے ہیں کہ وہ بھونک سکیں`۔
لامارٹ کا کہنا ہے کہ وہ مقامی عدالت میں اپیل دائر کرنے کا ارادہ رکھتے ہیں کیونکہ انھوں نے کبھی کسی کتے کو صبح سے شام تک بھونکتے نہیں دیکھا۔
یہ پہلی مرتبہ نہیں ہے کہ جب فرانسیسی حکام کی جانب سے اس قسم کی پابندی سامنے آئی ہے۔
2012 میں جنوب مغربی فرانس کے علاقے سینٹ فو لا گرانڈ میں بھی کتوں کے بھونکنے پر پابندی عائد کی گئی تھی۔
کیا کتوں کو بھونکنے سے روک سکتے ہیں؟
بھونکنا کتوں کے لیے بات چیت کا ایک عام طریقہ ہے۔ کتے بہت سی وجوہات کی بنا پر بھونکتے ہیں جن میں توجہ حاصل کرنا، خطرے کے بارے میں آگاہ کرنا اور بے چینی ظاہر کرنا شامل ہیں۔
تاہم اکثر مالکان اور پڑوسیوں کے جانب سے کتوں کے بہت زیادہ اونچا بھونکنے کی شکایت کی جاتی ہے۔
شور کی نوعیت مختلف ہوتی ہے تاہم کبھی کبھی یہ آواز فیکٹری میں چلنے والی مشین سے زیادہ اونچی ہوتی ہیں۔
آسٹریلیا کا گولڈن ریٹریور نسل کا چارلی نامی کتا سب سے اونچا بھونکنے کا عالمی ریکارڈ رکھتا ہے۔
چیریٹی ڈاگ ٹرسٹ میں کتوں کے روئیوں پر کام کرنے والی جینا کیڈی نے اینٹی بارک کالر اور کتوں کی تربیت کے دیگر طریقے استعمال کرنے سے متعلق خبردار کیا ہے۔
ان کا کہنا ہے کہ ضروری ہے کہ اس رویے کو تحقیق کے ذریعے حل کیا جائے۔
