مکہ اور مدینہ کے درمیان تیز ترین ٹرین سروس کا آغاز
،تصویر کا ذریعہReuters
شاہ سلمان نے سعودی عرب کے مقدس شہروں مکہ اور مدینہ کے درمیان تیز ترین مسافر ٹرین سروس کا افتتاح کیا ہے جس کی رفتار 300 کلومیٹر فی گھنٹہ ہے۔
براستہ جدہ، مکہ سے مدینہ جانے والی اس حرمین ایکسپریس لائن میں 35 ٹرینیں شامل ہیں۔
حکام کے مطابق ان میں چھ کروڑ افراد سالانہ سفر کرسکیں گے اور اس کا مقصد حاجیوں اور عمرہ کرنے آنے والے افراد کو سفر کی بہتر سہولیات فراہم کرنا ہے۔
اس ٹرین کا کمرشل آغاز آئندہ پیر سے شروع ہو جائے گا۔
یہ بھی پڑھیے
End of سب سے زیادہ پڑھی جانے والی
دونوں اطراف سے یومیہ آٹھ مسافر ٹرینیں چلیں گی اور سال کے آخر تک ٹرینوں کی تعداد بڑھا کر 12 تک کردی جائے گی۔
سعودی عرب کے وزیرِ ٹراسنسپورٹ نبی العمودی کا کہنا تھا ’دونوں شہروں کے درمیان سفر مختصر اور آسان ہو جائے گا۔ اس منصوبے سے ریاست کے، اسلام اور مسلمانوں کی خدمت کے جذبے کی عکاسی ہوتی ہے۔‘
،تصویر کا ذریعہReuters
حج اور عمرہ کے دوران مسلمان مکہ اور مدینے کے درمیان بس کے ذریعے سفر کرتے ہیں جس میں چھ گھنٹے لگ جاتے ہیں اب یہی سفر مختصر ہو کر دو گھنٹے رہ جائے گا۔
مکہ کا ریلوے سٹیشن مسجد الحرام سے چار کلومیٹر کے فاصلہ پر ہے۔ اس ریلوے سٹیشن میں ایک گھنٹے میں 20 ہزار مسافروں کو سفری سہولیات مہیا کی جاسکتی ہیں۔
یہ ریلوے لائن دو مراحل میں مکمل کی گئی اور اس میں سعودی، فرانسیسی ، چینی اور سپین کی کمپبنیوں نے حصہ لیا۔ منصوبے کی تکمیل میں چھ سال کا عرصہ لگا۔
