سعودی عرب: سکیورٹی آپریشن میں ’دو دہشتگرد ہلاک‘
،تصویر کا ذریعہAFP
اطلاعات کے مطابق سعودی عرب کے ساحلی شہر جدہ میں سکیورٹی فورسز کی ایک کارروائی کے دوران دو مشتبہ خود کش دہشتگرد ہلاک ہو گئے ہیں۔
برطانوی خبر رساں ادارے روئٹرز کے مطابق یہ واقعہ سنیچر کی صبح جدہ کے الحزارت کے علاقے میں اس وقت پیش آیا جب سکیورٹی فورسز اور ایک مکان میں چھپے ہوئے مبینہ دہشتگردوں کے دوران فائنرگ کا تبادلہ ہوا۔
سعودی عرب کی وزارتِ داخلہ سے منسلک ایک ویب سائٹ کا کہنا ہے کہ سکیورٹی فورسز کو اطلاع ملی تھی کہ مذکورہ مکان میں کچھ مسلح دہشتگرد چھپے ہوئے ہیں جس کے بعد وہاں یہ کارروائی کی گئی۔ دونوں جانب سے فائرنگ کے دوران ایک شخص ہلاک ہوگیا جبکہ دو دیگر مبینہ دہشتگردوں نے خود کو دھماکے سے اڑا دیا۔
متحدہ عرب امارات میں قائم ٹی وی چینل ’سکائی نیوز عریبیہ‘ نے اس کارروائی کی ایک ویڈیو بھی نشر کی ہے جس میں سکیورٹی اہلکاروں اور مبینہ دہشتگردوں کے درمیان فائرنگ کے تبادلے کے علاوہ ایک دھماکہ بھی دیکھا جا سکتا ہے۔
سعودی وزارتِ داخلہ کی جانب سے ابھی تک اس حوالے سے کوئی بیان سامنے نہیں آیا ہے۔
،تصویر کا ذریعہAFP
یاد رہے کہ سنہ 2014 کے وسط سے نام نہاد شدت پسند تنظیم دولتِ اسلامیہ سعودی عرب میں بم دھماکوں اور فائرنگ کی کئی کارروائیاں کر چکی ہے جن میں متعدد افراد ہلاک اور زخمی ہو گئے تھے۔ ہلاک و زخمی ہونے والوں کی اکثریت کا تعلق ملک کی شیعہ اقلیتی آبادی اور سکیورٹی فورسز سے تھا۔
گذشتہ سال جدہ میں ہی امریکی قونصل خانے کے قریب ایک دہماکہ بھی ہوا تھا جس میں خود کش حملہ آور ہلاک جبکہ دو دیگر افراد زخمی ہو گئے تھے۔ گذشتہ کئی دہائیوں میں سعودی عرب میں یہ ایسا پہلا حملہ تھا جس میں غیر ملکیوں کو نشانہ بنایا گیا تھا۔
جدہ میں مبینہ دہشتگردوں کی ہلاکت کے واقعے سے قبل سنیچر کو ہی سعودی عرب حکام نے کہا تھا کہ ملک میں حالیہ چند برسوں میں ہونے والے دہشت گردی کے واقعات میں 40 ممالک کے شہری ملوث ہیں۔
End of سب سے زیادہ پڑھی جانے والی
سعودی گیزٹ کے مطابق سعودی عرب کی وزارت داخلہ کے تواصل پورٹل (شعبہ مواصلات) کی جانب سے جاری کردہ بیان میں کہا گیا کہ ملک کی پانچ انٹیلی جنس جیلوں میں 5085 مشتبہ افراد زیر حراست ہیں۔
