برینڈن میکلم نے چونتیس گیندوں پر انسٹھ رنز بنائے

اس سے قبل پہلے میچ میں ’سپر اوور‘ کے قانون کے تحت ویسٹ انڈیز کی ٹیم فاتح رہی تھی۔

نیوزی لینڈ نے ٹاس جیت کر پہلے بلے بازی کرتے ہوئے مقررہ بیس اوورز میں نو وکٹ کے نقصان پر ایک سو نوے رن بنائے۔ نیوزی لینڈ کی اننگز کی خاص بات اوپنرز رائڈراور میکلم کی نصف سنچریاں تھیں۔ پہلی وکٹ کے لیے ان دونوں بلے بازوں کے درمیان ایک سو تیس رنز کی شراکت ہوئی۔

ویسٹ انڈیز نے 192 رن کے ہدف کے تعاقب میں اننگز شروع کی تو پہلے میچ کے مردِ میدان کپتان کرس گیل صرف ایک رن بنا کر پویلین لوٹ گئے۔ بقیہ ویٹس انڈین کھلاڑیوں میں سے اوپنر رمیش سروان کے علاوہ کوئی بھی بلے باز بڑا سکور کرنے میں ناکام رہا۔

سروان نے چھتیس گیندوں پر ترپّن رنز کی اننگز کھیلی لیکن وہ اپنی ٹیم کو فتح سے ہمکنار نہ کروا سکے اور ویسٹ انڈیز کی ٹیم مقررہ بیس اوور میں سات وکٹ کے نقصان پر ایک سو پچپن رن ہی بنا سکی۔

نیوزی لینڈ کی جانب سے جیتن پٹیل اور ڈینیئل ویٹوری نے دو ، دو جبکہ تھامسن،سودی اور جیکب اورم نے ایک، ایک وکٹ حاصل کی۔