گنگولی اگر پلیئنگ الیون میں شامل ہوئے تو چھٹے نمبر پر کھیلیں گے

سنہ دو ہزار ایک میں سٹیو وا کی قیادت میں بھارت کا دورہ کرنے والی آسٹریلوی ٹیم کو ہرانے والے بھارتی کپتان گنگولی کا ٹیم میں چھٹے نمبر پر کھیلنے کے لیے نو آموز بلے باز سبرمینئیم بدری ناتھ کے ساتھ مقابلہ ہے۔

بھارتی ٹیم کے پندرہ رکنی سکواڈ میں ایک نیا نام لیگ سپنر، امیت مشرا کا ہے جو انیل کمبلے اور ہربھجن سنگھ کے ساتھ ٹیم کے تین سپن بالروں میں شامل ہیں۔سکواڈ میں شامل کیے جانے والے چار تیز بالروں میں ظہیر خان، مناف پٹیل، ایشانت شرما اور رودرا پرتاپ سنگھ شامل ہیں۔

بلے باز یوراج سنگھ، آکاش چوپڑا اور محمد کیف کو ٹیم میں شامل نہیں کیا گیا ہے۔ اس ٹیم کے انتخاب نے بھارت کے چار اہم بلے بازوں کی کارکردگی کے امکانات بڑھا دیے ہیں جن میں گنگولی، سچن تندولکر، راہول ڈراوڈ اور وی وی ایس لکشمن شامل ہیں۔

بھارتی ٹیم میں گنگولی کی شرکت کرکٹ کے بعض حلقوں میں متنازعہ سمجھی جائے گی۔ چھتیس سالہ گنگولی نے ایک سو نو ٹیسٹ میچوں میں چھ ہزار آٹھ سو اٹھاسی رن تو بنائے ہیں لیکن انہوں نے بھارت کے روایتی ٹیسٹ سلیکشن ٹرائل ایرانی ٹرافی میں حصہ نہیں لیا۔

اس کے علاوہ گنگولی نے نہ تو سری لنکا میں ہونے والی ٹیسٹ سیریز میں اچھی بیٹنگ کی اور نہ ہی انہوں نے گزشتہ روز بنگلور میں میں شروع ہونے والے بھارت کے کنڈیشنگ کیمپ میں حصہ لیا ہے۔