 | | | مائیکل وان کچھ عرصے سے آٰؤٹ آف فارم تھے |
انگلینڈ کی ٹیسٹ ٹیم کے کپتان مائیکل وان نے کپتانی سے مستعفی ہونے کا اعلان کر دیا ہے۔ مائیکل وان نے کپتانی چھوڑنے کا اعلان جنوبی افریقہ سے لگاتار دوسرا ٹیسٹ میچ ہارنے کے بعد کیا۔اس پریس کانفرنس سے قبل یہ خیال کیا جارہا تھا کہ سلیکٹروں نے انہیں کپتانی سے ہٹانے کا فیصلہ کر لیا ہے۔ وہ پانچ سال تک انگلینڈ کے کپتان رہے۔ ان کا کہنا تھا کہ انہوں نے دل و جان سے اپنی ذمہ داری نبھائی اور اب میرا دماغ انہیں یہ کہہ رہا ہے کہ وہ اسے چھوڑ دیں۔وان نے کہا کہ وہ جنوبی افریقہ کے خلاف آخری ٹیسٹ کے لیے دستیاب نہیں ہوں گے تاہم وہ امید کرتے ہیں کہ انہیں مستقبل میں انگلینڈ کی ٹیم میں شامل کیا جائے گا۔ مائیکل وان نے کہا کہ انہوں نے پہلی بار اس برس کے آغاز میں دورۂ نیوزی لینڈ کے دوران کپتانی چھوڑنے کے بارے میں سوچا تھا۔ تاہم انہوں نے کہا کہ’ میں جانتا ہوں کہ یہی کپتانی سے علیحدہ ہونے کا صحیح وقت ہے کیونکہ میرا دماغ مجھے یہ بتا رہا ہے۔ میرا جسم صحیح کام کر رہا ہے تاہم میرا ذہن اس کا ساتھ نہیں دے رہا‘۔ وان کافی دنوں سے آؤٹ آف فارم تھے اور 2007 کے عالمی کپ کے بعد انہیں انگلینڈ کی ون ڈے کی ٹیم کی کپتنانی سے ہٹا دیا گیا تھا کیونکہ سلیکٹروں کا خیال تھا کہ ان کا کھیل ون ڈے کے تقاضوں سے مطابقت نہیں رکھتا۔ | 
43 سال بعد انگلینڈ میں فتح
