مناء رانا بی بی سی اردو ڈاٹ کام، لاہور

	محمد آصف ماضی میں بھی تنازعات کا شکار رہے ہیں

لاہور پہنچ کر انہوں نے صحافیوں سے بات کرتے ہوئے کہا کہ وہاں ان کے جتنے بھی ٹیسٹ لیے گئے وہ سب درست تھے اور اس سے پہلے پاکستان کرکٹ بورڈ نے آئی پی ایل سے پہلے ان کا جو ڈوب ٹیسٹ لیا تھا وہ بھی ٹھیک تھا جس سے ثابت ہوتا ہے کہ وہ کوئی ممنوعہ دوا استعمال نہیں کرتے۔انہوں نے کہا کہ وہ پاکستان کرکٹ بورڈ کی اس سلسلے میں ہدایات پر پورا عمل کرتے ہیں۔

آصف رہا ، وطن واپس پہنچ گئے

محمد آصف کی رہائی کا فیصلہ

محمد آصف نے کہا کہ ان کے پاس حکیم کی ایک دوا تھی اور انہیں معلوم نہیں تھا کہ اس میں افیون تھی یا نہیں۔

محمد آصف نے ان تمام افراد کا شکریہ ادا کیا جنہوں نے ان کی رہائی میں کردار ادا کیا۔

انہوں نے پاکستان کرکٹ بورڈ کے چئرمین ڈاکٹر نسیم اشرف اور دبئی میں پاکستان کے سفیر احسان اللہ کا خاص طور پر شکریہ ادا کیا۔

ادھر پاکستان کرکٹ بورڈ کے چئرمین نے اعلان کیا کہ محمد آصف کے معاملے کی تحقیقات کی جائیں گی اور اس سلسلے میں آج ایک تین رکنی کمیٹی قائم کر دی جائے گی۔

پاکستان کرکٹ بورڈ کے چئرمین ڈاکٹر نسیم اشرف جمعے شام کو محمد آصف سے ملنے کے بعد ذرائع ابلاغ کو حالات سےآگاہ کریں گے۔

ادھر انٹرنیشنل کرکٹ کونسل کے کمیونیکیشن آفیسر سمیع الحسن برنی کا کہنا ہے کہ آئی سی سی نے پاکستان کرکٹ بورڈ کو ہدایت دی ہے کہ وہ آصف کے سلسلے میں کی گئی تمام تحقیقات سے آئی سی سی کو آگاہ رکھیں۔

انہوں نے کہا کہ ابھی تک تو محمد آصف کے کیس کے سلسلے میں کوئی بات سامنے نہیں آئی لیکن کیونکہ آئی سی سی عالمی ڈوپنگ ایجینسی کی رکن ہے اس لیے وہ اس تمام معاملے پر نظر رکھے ہوئے ہے۔