سلمان بٹ دس چوکوں کی مدد سے ستّر رن بنا کر آؤٹ ہوئے

پاکستان کے 233 رن جواب میں بنگلہ دیش کی ٹیم مقررہ چالیس اوور میں آٹھ وکٹ کے نقصان پر ایک سو تریسٹھ رن بنا سکی۔میچ کے آغاز سے قبل ہونے والی بارش کے بعد میدان گیلا ہونے کی وجہ سے ایمپائروں نے میچ چالیس اوورز تک محدود کر دیا تھا۔

میچ کا سکور کارڈ

بنگلہ دیش کی جانب سے محمد اشرفل کے علاوہ کوئی بھی بلے باز قابلِ دکر کارکردگی کا مظاہرہ نہ کر سکا۔ اشرفل نے نصف سنچری بنائی اور وہ چھپن رن پر ناٹ آؤٹ رہے۔ اوپنر تمیم اقبال بنگلہ دیش کی اننگز کے دوسرے بڑے سکورر تھے۔ وہ انتیس رن بنا کر شاہد آفریدی کی گیند پر سٹمپ ہوئے۔

پاکستان کی جانب سے شاہد آفریدی اور وہاب ریاض نے تین، تین جبکہ عمر گل نے دو وکٹیں حاصل کیں۔

اس سے قبل بنگلہ دیش نے ٹاس جیت کر پاکستان کو پہلے کھیلنے کی دعوت دی تھی اور پاکستان کی پوری ٹیم چالیسویں اوور میں 233 رن بنا کر آؤٹ ہوگئی۔ پاکستان کے آؤٹ ہونے والے آخری کھلاڑی وہاب ریاض تھے جنہیں عبدالرزاق نے ایل بی ڈبلیو کیا۔ پاکستان کے آخری پانچ کھلاڑی سکور میں صرف بتیس رن کا اضافہ کر سکے۔

	میدان میں خراب موسم کے باوجود تماشائیوں کی بڑی تعداد موجود ہے

پاکستان کی جانب سے سلمان بٹ اور محمد یوسف کی نصف سنچریاں بنائیں۔ سلمان بٹ نے 70 جبکہ محمد یوسف نے 59 رن بنائے۔اس کے علاوہ مصباح الحق نے اننگز کے اختتامی لمحات میں بائیس گیندوں پر انتالیس رنز کی جارحانہ اننگز کھیلی۔بنگلہ دیش کی جانب سے عبدالرزاق اور الوک کپالی نے تین، تین جبکہ مشرفی مرتضٰی نے دو وکٹیں حاصل کیں۔

یاد رہے کہ یہ ایک روزہ میچوں میں پاکستان کی لگاتار بارہویں فتح ہے۔اس سے قبل شعیب ملک کی قیادت میں پاکستانی ٹیم بھارت، زمبابوے اور بنگلہ دیش کے خلاف لگاتار گیارہ ون ڈے انٹرنیشنل میچ جیت چکی ہے۔

پاکستان اور بنگلہ دیش کے علاوہ اس سیریز میں بھارتی ٹیم بھی شریک ہے اور ٹورنامنٹ میں دس جون کو بھارت اور پاکستان مدمقابل ہونگے جبکہ بارہ جون کو بھارت کا مقابلہ بنگلہ دیش سے ہوگا۔ سیریز کا فائنل چودہ جون کو کھیلا جائےگا۔

پاکستان ٹیم: کامران اکمل، سلمان بٹ، یونس خان، شعیب ملک، مصباح الحق، شاہد آفریدی، فواد عالم، سہیل تنویر، وہاب ریاض، عمر گل، محمد یوسف

بنگلہ دیش ٹیم: شہریار نفیس، تمیم اقبال، محمد اشرفل، رقیب الحسن، الوک کپالی، محمود اللہ، مشفق الرحیم، مشررفی مرتضٰی، دلار محمود، عبدالرزاق، شہادت حسین