ہربھجن نے اپنے ساتھی شریسنتھ کو تھپڑ مار دیا تھا

بدھ کو تین ارکان پر مشتمل بی سی سی آئی کی تادیبی کمیٹی نے ان پر پابندی لگانے کا فیصلہ کیا۔ تادیبی کیمٹی کی سربراہی بی سی سی آئی کے صدر شرد پوار نے کی اور اس کے دیگر ارکان میں ششانک منوہر اور چیرایو امین تھے۔

واضح رہے کہ سری سنتھ کو تھپڑ مارنے کے معاملے کی تفتیش کرنے والے جسٹس سدھیر ناناوتی نے منگل کو بی سی سی آئی کو اپنی رپورٹ پیش کر دی تھی۔ تاہم اس کمیٹی نے اپنی رپورٹ میں کسی قسم کی پابندی کی سفارش نہيں کی تھی۔

بی بی سی آئی کے صدر شرد پوار نے کہا کہ ناناوتی رپورٹ کے مطابق ہربھجن کو ضابطۂ اخلاق کی خلاف ورزی کا مرتکب پایا گيا۔ ان کا مزید کہنا تھا کہ اگر ہربھجن نے آئندہ کوئي غلطی کی تو ان پر تاحیات پابندی لگا دی جائے گی۔

یاد رہے کہ پچیس اپریل کو آئی پی ایل مقابلوں کے دوران ممبئی انڈینز اور پنجاب کنگز الیون کی ٹیم کے درمیان میچ ختم ہونے پر ممبئی ٹیم کے کپتان ہر بھجن سنگھ نے پنجاب ٹیم کے بالر سری سنتھ سے ہاتھ ملانے کی بجائے انہیں تھپڑ رسید کر دیا تھا جس کے بعد آئی پی ایل کی تادیبی کمیٹی نے ان پر گیارہ آئي پی ایل میچیز کھیلنے پر پابندی عائد کر دی تھی جس سے وہ تقریباً دو کروڑ ستر لاکھ روپے کی میچ فیس سے بھی محروم ہو گئے تھے۔