گیری کرسٹن جنوبی افریقہ کے لیے سلامی بلے باز ہوا کرتے تھے

خبر رساں ادارے پی ٹی آئی اور بھارتی ذرائع ابلاغ کے مطابق ’یہ بات اب تقریبا طے ہے کہ بھارتی کرکٹ ٹیم کے اگلے کوچ گیری کرسٹن ہوں گے۔‘

کوچ سلیکشن کمیٹی نےگزشتہ شام کوگیری کرسٹن کا انٹرویو کیا ہے۔ اس کے متعلق کرکٹ بورڈ کے نائب صدر راجیو شکلا نے کہا: ’ کمیٹی کے ارکان نےگیری کرسٹن سے تفصیلی بات چيت کی ہے اور کرکٹ بورڈ کوچ کے متعلق باقاعدہ اعلان ایک ہفتے کےاندر کردےگا۔‘

پی ٹی آئی کے مطابق کرکٹ بورڈ گیری کے ساتھ مکمل معاہدہ ہونے سے پہلے اس کی تفصیل افشاں کرنا نہیں چاہتا اور محتاط رویہ اپنا رہا ہے کیونکہ پچھلی بارگراہم فورڈ کے معاملے میں بورڈ کی سبکی ہوئی تھی۔

سابق کوچ گریگ چیپل کے استعفے کے بعد بھارتی کرکٹ بورڈ نے گراہم فوڑد کو نیا کوچ بنانے کا اعلان کیا تھا لیکن فورڈ نے یہ عہدہ لینے سے منع کردیا تھا تب سےانڈین کرکٹ ٹیم کے پاس کوئی کوچ نہیں ہے۔

بھارتی کرکٹ بورڈ کے صدر شرد پوار نے حال ہی میں کہا تھا کہ بھارتی ٹیم آسٹریلیائی دورے پر ایک نئے کوچ کے ساتھ جائے گي اور’آئندہ دس روز کے اندر کوچ کے متعلق فیصلہ کر لیا جائےگا۔‘

پی ٹی آئی نے بورڈ کے ایک رکن کا بیان نقل کیا ہے جس کے مطابق بھارتی بورڈ کو آسٹریلیا کے سابق کوچ جان بکانن میں بھی دلچسپی ہے لیکن چونکہ گیری کرسٹن کو بلایا جاچکا ہے اس لیے اب یہ عہدہ انہیں کو سونپا جائےگا۔