عبدالرشید شکور بی بی سی اردو ڈاٹ کام کراچی

	پاکستان اوپن اب غیرملکی کھلاڑیوں کے بغیر کھیلی جائے گی

یہ پہلا موقع ہے کہ سکواش کی عالمی تنظیم نے براہ راست پاکستان اوپن میں حصہ نہ لینے کا فیصلہ کیا ہے ورنہ عام طور پر کسی ٹورنامنٹ سے دستبرداری کا فیصلہ کھلاڑی انفرادی طور پر کرتے ہیں۔

دلچسپ بات یہ ہے کہ پاکستان اوپن میں اس مرتبہ خواتین ایونٹ بھی رکھا گیا ہے اور خواتین کھلاڑیوں کی عالمی تنظیم وسپا نے پاکستان اوپن سے دستبردار ہونے کا کوئی فیصلہ نہیں کیا ہے اور غیرملکی خواتین کھلاڑی اس ایونٹ میں حصہ لیں گی۔

پاکستان اوپن اب غیرملکی کھلاڑیوں کے بغیر کھیلی جائے گی اور پاکستان سکواش فیڈریشن کے سیکرٹری ونگ کمانڈر شمس الحق کا کہنا ہے کہ یہ معاملہ پروفیشنل سکواش ایسوسی ایشن کے سامنے اٹھایا جائے گا کیونکہ کئی کھلاڑیوں نے اپنی انٹریز بھی بھیج دی تھیں اور ڈراز بھی تیار تھے۔

پاکستان میں غیرمعمولی صورتحال کے بعد عالمی رینکنگ کے ابتدائی بارہ کھلاڑیوں نے پاکستان اوپن میں حصہ نہ لینے کا فیصلہ کیاتھا جس کے بعد عالمی نمبر تیرہ آسٹریلیا کے اسٹورٹ بوزویل کو ٹاپ سیڈ رکھا گیا تھا لیکن اب تمام کے تمام غیرملکی کھلاڑی مقابلے سے غیرحاضر ہوں گے۔

پاکستان میں ایمرجنسی کے بعد ویمنزکرکٹ ورلڈ کپ کوالیفائنگ ایونٹ بھی ملتوی کیا جا چکا ہے جو انیس سے پچیس نومبر تک لاہور میں ہونا تھا جس میں پاکستان کے علاوہ جنوبی افریقہ، زمبابوے، برمودا، ہالینڈ، آئرلینڈ، سکاٹ لینڈ اور پاپوا نیوگنی کی ٹیموں نے حصہ لینا تھا لیکن آئی سی سی نے طویل غور و خوص کے بعد اسے پاکستان میں فوری طور پر نہ کرانے کا فیصلہ کیا۔ آئی سی سی کا کہنا ہے کہ کھلاڑیوں کی حفاظت اور سکیورٹی اس کی اولین ترجیح ہے۔