 | | | پولیس کے مطابق گزشتہ اتوار کو باب وولمر کا گلا گھونٹ دیا گیا تھا |
پاکستانی کرکٹ ٹیم جمیکا سے لندن پہنچ گئی جہاں سے وہ اطلاعات کے مطابق جلد پاکستان روانہ ہو جائے گی۔ ٹیم کے تعلقات عامہ کے مینیجر پرویز میر نے کہا ہے کہ ٹیم کا ’آج ہی پاکستان روانہ ہونے کا پروگرام ہے‘۔ اس سے قبل جمیکا میں کوچ باب وولمر کی ہلاکت کی تحقیقات کرنے والی پولیس ٹیم نے انضمام الحق اور نائب کوچ مشتاق احمد سے پوچھ گھ کے بعد ٹیم کو واپس پاکستان جانے کی اجازت دیدی۔ جمیکا پولیس کے ڈپٹی کمشنر مارک شیلڈز نے بتایا کہ پاکستانی ٹیم نے ان کے ساتھ مکمل تعاون کیا ہے۔ انہوں نے کہا کہ ٹیم کے ارکان سے پوچھ گچھ رسمی کارروائی تھی۔ پاکستانی کرکٹ ٹیم کے ترجمان پی جے میر نے بی بی سی کو بتایا کہ سنیچر کو جمیکا کی پولیس نے انضمام الحق اور اسسٹنٹ کوچ مشتاق احمد سے وولمر قتل کے معاملے میں بات چیت کی۔ انضمام الحق اور مشتاق احمد سے پوچھ گچھ وولمر ’قتل‘ معاملے میں پاکستانی ٹیم کے اراکین سے پولیس کی دوسری پوچھ گچھ ہے۔ پولیس اہلکاروں کی جانب سے پوچھ گچھ کے بعد انضمام الحق نے برطانوی ٹیلی ویژن اسکائی نیوز کو بتایا کہ یہ معمول کی کارروائی تھی جس کے بعد کہا گیا وہ واپس پاکستان جاسکتے ہیں۔ پاکستانی ٹیم کی وطن واپسی پر کوئی پابندی نہیں تھی۔ ادھر امریکی دارالحکومت واشنگٹن میں واقع پاکستانی سفارت خانے کے دو اہلکار فرسٹ سیکرٹری زاہد حسین چودھری اور کونسلر شاہد احمد جمیکا پہنچ گئے ہیں۔ کِنگسٹن میں بی بی سی اردو ڈاٹ کام کے نامہ نگار شفیع نقی جامعی کے مطابق جمیکا کی پولیس نے دونوں پاکستانی سفارتکاروں کو باب وولمر کے قتل کے معاملے میں بریفِنگ دی ہے۔ باب وولمر کی لاش ابھی بھی تحقیقات کے سلسلے میں جمیکا میں ہی ہے۔ ان کے ’قتل‘ کی تحقیقات کرنے والی پولیس ٹیم فارنزِک رپورٹ کا انتظار کررہی ہے۔ پوسٹ مارٹم کی رپورٹ کی بنیاد پر جمیکا کی پولیس نے کہا ہے کہ باب وولمر کو گزشتہ اتوار کے روز ان کے ہوٹل کے کمرے میں گلا گھونٹ کر ہلاک کردیا گیا تھا۔ | 
ایشیا کپ، سہیل اور وسیم دستیاب
