مناء رانا بی بی سی اردو ڈاٹ کام، لاہور

	پاکستان کی ٹیم تو نہیں لیکن فٹبال ضرور فائنل راؤنڈ تک پہنچتے رہے ہیں

پنجاب فٹ بال سٹیڈیم لاہور میں ہونے والے پاکستان اور سنگا پور کی انڈر 21 ٹیموں کے درمیان ہونے والے اس میچ میں پاکستان نے2-3 سے فتح حاصل کی۔
اولمپک گیمز کے پری کوالیفائنگ راؤنڈ کے پہلے میچ میں پاکستان کی ٹیم نے سات فروری کو سنگا پور میں ہونے والے پہلے میچ میں سنگا پور کو 1-2 سے ہرایا تھا۔

اسی سلسلے میں بدھ کو لاہور میں دونوں ٹیموں کے درمیان دوسرا میچ کھیلا گیا۔
پاکستان کی ٹیم نےآغاز سے ہی جارحانہ انداز اپنایا لیکن میچ کے پہلے ہاف میں یقینی گول کرنے کے مواقع ضائع کیے۔

سنگاپور کی ٹیم نے ملنے والے موقعوں سے فائدہ اٹھاتے ہوئے پے در پے دو گول کر دیے۔ یہ دونوں گول سنگاپور کی ٹیم کے کپتان محمد خیر الامری نے پہلے ہاف کے 31 ویں اور 39 ویں منٹ کیے۔

دو گول کا خسارہ اٹھانے کے بعد پاکستان کی ٹیم کے کوچ محمد رشید نے دوسرے ہاف میں اپنی حکمت عملی تبدیل کی اور فارورڈ فاروق شاہ کو میدان میں بھیجا۔ فاروق شاہ نے جاتے ہی کھیل کا منظر تبدیل کر دیا۔ فاروق شاہ کی ایک موو پر شنگا پور کے دفاعی کھلاڑی اسکندر بن یوسف نے اوون گول کر دیا جس سے سنگا پور کی برتری کم ہو گئی۔

میچ کے 76 ویں منٹ میں فاروق شاہ نے انتہائی خوبصورت گول کر کے میچ 2-2 گول سے برابر کر دیا۔میچ کے 89 ویں منٹ میں پاکستان کی جانب سے محمد رسول نے تیسرا اور فیصلہ کن گول کر دیا۔

سنگاپور کے خلاف دونوں میچ جیت کر پاکستان کی انڈر 21 ٹیم نے اولمپک گیمز کے پری کوالیفائنگ راؤنڈ کا پہلا مرحلہ عبور کر لیا اب دوسرے مرحلے میں پاکستان کا مقابلہ بحرین،کویت اور قطر جیسی مضبوط ٹیموں کے ساتھ ہو گا۔ اس سلسلے میں پاکستان کی ٹیم اپنا اگلا میچ 28 فروری کو بحرین کے خلاف کھیلے گی۔

پاکستان کی ٹیم کے کپتان زاہد حمید کا کہنا ہے کہ سنگاپور کو شکست دینے سے پاکستان کی ٹیم کے حوصلے بلند ہو گئے ہیں جس کا فائدہ اگلے راؤنڈ میں ہو گا۔

زاہد حمید نے اس فتح کا سہرا فارورڈ فاروق شاہ کے سر باندھا ہے کیونکہ سنگا پور میں ہونے والے میچ کے دونوں گول بھی فاروق شاہ نے کیے تھے۔
پاکستان فٹ بال فیڈریشن نے پہلا میچ جیتنے پر ٹیم کو پانچ لاکھ کے انعام کا اعلان کیا تھا اور دوسرے میچ کی فتح پر ٹیم کے لیے دس لاکھ روپے کے انعام کا اعلان کیا ہے۔