مناء رانا بی بی سی اردو ڈاٹ کام، لاہور

	رانا نوید نے ہفتے کو نیٹ پریکٹس میں لگاتار دس اوورز کروائے

رانا نوید نے کہا کہ اگرچہ انہیں ٹیسٹ سیریز میں پاکستان کی نمائندگی نہ کرنے کا افسوس ہے لیکن وہ خوش ہیں کہ صحت یاب ہو کر ایک روزہ سیریز کے لیے پاکستان کی ٹیم میں شمولیت کے لیے انگلینڈ جا رہے ہیں۔

محمد آصف جو اوول ٹیسٹ سے پہلے ہی فٹ ہو گئے تھے لیکن انگلینڈ میں پاکستان کی ٹیم مینجمنٹ نے انہیں اوول ٹیسٹ کے لیے بلوانا ضروری نہیں سمجھا لیکن اب وہ ایک روزہ سیریز میں شرکت کے لیئے جا رہے ہیں۔

رانا نوید نے ہفتے کو نیٹ پریکٹس میں لگاتار دس اوورز کروائے اور اتوار کو مقامی کلب کے خلاف میچ میں چھ اوورز کروائے۔

رانا نوید کے مطابق انہیں بالنگ کرواتے ہوئے کسی قسم کی کوئی تکلیف نہیں ہوئی اور وہ مکمل طور پر فٹ ہو گئے ہیں۔ ان کا کہنا ہے کہ ’ہماری کوشش ہو گی کہ اپنی ٹیم کے لیے بہترین کارکردگی کا مظاہرہ کریں اور ایک روزہ سیریز میں پاکستان کی جیت میں اہم کردار ادا کریں‘۔

	ون ڈے سیریز جیت کر ٹیسٹ سیریز میں ہار کا داغ دھو دیں گے

محمد آصف کا کہنا ہے کہ اصل کرکٹ تو ٹیسٹ کرکٹ ہوتی ہے اور اس میں کھلاڑی اپنی صلاحیت کا بھر پور مظاہرہ کر سکتا ہے۔ انہوں نے کہا کہ ٹیسٹ سیریز کا کوئی میچ بھی نہ کھیل سکنے کا ان کو افسوس ہے لیکن ان کی کوشش ہو گی کہ وہ ایک روزہ سیریز میں اپنی تمام تر صلاحیت کو بروئے کار لاتے ہوئے پاکستان کو فتح دلوانے میں اپنا کردار ادا کریں۔

محمد آصف نے کہا کہ ’ہماری ٹیم بہت اچھی ہے اور ہم ون ڈے سیریز جیت کر ٹیسٹ سیریز میں ہار کا داغ دھو دیں گے‘۔

دونوں کھلاڑی اتوار اور پیر کی درمیانی شب انگلینڈ روانہ ہو رہے ہیں جہاں وہ انگلینڈ کے خلاف ایک روزہ میچوں کی سیریز میں پاکستان کی نمائندگی کرسکیں گے۔