رونالڈو نے اب تک عالمی کپ میں 15 گول کیئے ہیں

فٹ بال کے عالمی کپ کے دوسرے راؤنڈ کے آخری دن پہلے میچ میں برازیل نے گھانا کو صفر کے مقابلے میں تین گول سے شکست دی جبکہ فرانس نے سپین کو ایک کے مقابلے میں تین گول سے ہرایا۔

فٹبال عالمی کپ: خصوصی ضمیمہ

ورچوئل ری پلے: برازیل بمقابلہ گھانا

تماشائیوں کا جوش

فرانس کے خلاف میچ میں پنلٹی پر ڈیوڈ وِلا کے گول کی بدولت سپین نے پہلے برتری حاصل کی۔

سپین کو پنلٹی اس وقت دی گئی جب فرانسیسی دفاعی کھلاڑی لِلین تھرام نے ہسپانوی کھلاڑی اِبانے پیبلو کے خلاف گول کے سامنے فاؤل کیا۔

فرانس نے سپین کی برتری اس وقت ختم کر دی جب پیٹرِک ویارا کے ایک خوبصورت پاس پر فرینک رِبیری نے گول کیا۔

میچ کا وقت ختم ہونے سے سات منٹ پہلے پیٹرک ویارا کے گول کر کے فرانس کو برتری دلا دی۔

میچ کا مقررہ وقت ختم ہونے کے بعد اضافی وقت میں فرانس کی طرف سے زیدان نے ایک اور گول کر کے سکور ایک تین کر دیا۔

اس کے پہلے برازیل کی جانب سے پہلا گول کھیل کے ابتدائی لمحات میں رونالڈو نے کیا اور اس گول کے ساتھ ہی وہ ورلڈ کپ مقابلوں میں سب سے زیادہ گول کرنے والے کھلاڑی بن گئے۔ یہ فٹبال عالمی کپ میں رونالڈو کا پندرہواں گول تھا۔

ایڈریانو نے پہلے ہاف کے اختتامی لمحات میں برازیل کی برتری کو دوگنا کر دیا اور یوں پہلے ہاف کے اختتام پر برازیل کی ٹیم دو گول سے جیت رہی تھی۔

دوسرے ہاف میں بھی برازیل نےگھانا کی ٹیم پر اپنا دباؤ برقرار رکھا اور کھیل کے چوراسیویں منٹ میں زی رابرٹو نے گول کر کے اپنی ٹیم کی فتح کو یقینی بنا دیا۔

برازیل کی ٹیم اس فتح کے بعد کوارٹر فائنل میں پہنچ گئی ہے جہاں اس کا مقابلہ
فرانس سے ہوگا۔

جرمنی میں کھیلے جانے والے عالمی کپ کے ان مقابلوں کے کواٹر فائنلز کا مرحلہ جمعہ سے شروع ہو رہا ہے۔

کواٹر فائنل مقابلوں کے لیے برازیل اور فرانس کے علاوہ جو چھ ٹیمیں کوالیفائی کر چکی ہیں وہ جرمنی، ارجنٹینا، اٹلی، یوکرین، انگلینڈ اور پرتگال ہیں۔

جمعہ کو ہونے والے پہلے کواٹر فائنل میں جرمنی اور ارجنٹینا کی ٹیمیں مدمقابل ہوں گی۔ جمعہ ہی کو ہونے والے دوسرے کواٹر فائنل میں اٹلی کا مقابلہ یوکرین سے ہوگا۔

اس طرح ہفتے کو بھی دو کواٹر فائنل ہوں جن میں پہلے میچ میں انگلینڈ اور پرتگال آمنے سامنے ہوں گے۔ دوسرے کواٹر فائنل میں برازیل کا مقابلہ فرانس سے ہو گا۔