پرتگال کے کپتان فیگو کو اپنی ٹیم سے بہت امیدیں ہیں

آج کا پہلا میچ گروپ ڈی میں ایران اور پرتگال کے درمیان کھیلا جائے گا۔

فٹبال عالمی کپ 2006: خصوصی ضمیمہ

ایران نے آج تک عالمی کپ مقابلوں کے صرف ایک میچ میں فتح حاصل کی ہے اور انہیں یہ موقع سنہ 1998 کے عالمی کپ میں ملا تھا جب ایران نے امریکہ کو ایک کے مقابلے میں دو گول سے شکست دی تھی۔ ایران کے خلاف میچ میں پرتگال کی فتح کی صورت میں گزشتہ تین فٹبال ورلڈ کپ میں یہ پہلا موقع ہوگا کہ پرتگال کی ٹیم پہلے راؤنڈ سے آگے جائے گی۔

جمعہ کی رات گروپ ڈی میں انگولا اور میکسیکو کا میچ برابر رہنے کی وجہ سے تاحال یہ واضح نہیں کہ اس گروپ سے کون سی ٹیمیں اگلے راؤنڈ میں جا سکتی ہیں۔ اس گروپ میں میکسیکو کی ٹیم اس وقت دو میچوں میں چار پوائنٹس حاصل کرنے کے بعد سرِ فہرست ہے اور اگر ایران کی ٹیم آج کے میچ میں شکست سے بچنے میں کامیاب رہی تو یہ گروپ انتہائی دلچسپ صورت اختیار کر لےگا۔

نویں دن کا دوسرا میچ جمہوریہ چیک اور گھانا کی ٹیموں کے مابین ہوگا۔ امریکہ کو تین صفر سے شکست دینے کے بعد جمہوریہ چیک کی ٹیم کے حوصلے بلند ہیں اور وہ آج کے میچ میں گروپ کی کمزور ٹیم گھانا کو ہرا کر دوسرے راؤنڈ میں یقینی طور پر اپنی جگہ بنانے کی کوشش کرے گی۔ تاہم جمہوریہ چیک کو اس میچ میں اپنے دونوں سٹار سرائیکرز میلان باروس اور ژان کالر کی خدمات حاصل نہیں۔ یہ دونوں کھلاڑی زخمی ہونے کی وجہ سے گھاناکے خلاف نہیں کھیلیں گے اور جمہوریہ چیک کے اٹیک کی ذمہ داری ورتسلاؤ لونینک پر ہو گی۔

گروپ ای کے تیسرے میچ اٹلی اور امریکہ کی ٹیمیں مدِ مقابل ہوں گی۔ امریکہ کو ٹورنامنٹ میں رہنے کے لیئے اس میچ میں فتح حاصل کرنا ضروری ہے جبکہ اٹلی کی ٹیم اپنے افتتاحی میچ میں گھانا کے خلاف فتح کے بعد یہ میچ جیت کر دوسرے راؤنڈ میں اپنا جگہ یقینی بنانے کی کوشش کرے گی۔