عبدالرشید شکور، مناء رانا بی بی سی اردو ڈاٹ کام، لاہور

	آفریدی کی ریٹائرمنٹ کو کرکٹ حلقوں میں سنجیدگی سے لیا گیا تھا

جمعرات کو قذافی سٹیڈیم لاہور میں شاہد آفریدی نے پاکستان کرکٹ بورڈ کے چیئرمین شہریار خان سے ملاقات کے بعد اپنی عارضی ریٹائرمنٹ واپس لینے کا اعلان کیا۔

اب آفریدی انگلینڈ کے دورے میں پاکستان کی ٹیم کو ٹیسٹ اور ون ڈے دونوں قسم کی کرکٹ کے لیے دستیاب ہوں گے۔

پاکستان کرکٹ بورڈ کے سربراہ شہریار خان نے شاہد آفریدی کے فیصلے کا خیر مقدم کرتے ہوئے کہا کہ کرکٹ بورڈ کو ان حالات کا بخوبی احساس ہے جو شاہد کے ریٹائرمنٹ لینے کی وجہ بنے۔ انہوں نے کہا کہ آفریدی نے ان کی درخواست پر ملکی مفاد کے پیش نظر اپنا فیصلہ واپس لیا ہے۔

شاہد آفریدی نے بی بی سی سے بات کرتے ہوئے کہا کہ’میں نے ریٹائرمنٹ کا فیصلہ کرتے وقت ان لوگوں کو بھی اعتماد میں نہیں لیا جن کا میں بہت احترام کرتا ہوں اور ان کے مفید مشوروں سے استفادہ کرتا ہوں‘۔

شاہد آفریدی کا کہنا تھا کہ’ابوظہبی میں بھارت کے خلاف میچوں کے دوران کوچ باب وولمر نےبھی مجھ سے بات کی۔ وہ بھی میرے اس فیصلے پر خوش نہیں تھے اور ان کا کہنا تھا کہ میں نے یہ فیصلہ جلدبازی میں کیا ہے‘۔

عوامی حلقوں میں بھی آفریدی سے ریٹائرمنٹ کا فیصلہ واپس لینے کا شدت سے مطالبہ کیا جارہا تھا۔

پاکستانی کرکٹ شائقین میں مقبول ترین کرکٹر شاہد آفریدی نے سری لنکا کے دورے سے واپس آنے کے بعد ٹیسٹ کرکٹ سے عارضی علیحدگی کا اعلان کیا تھا۔ سری لنکا میں شاہد آفریدی کو دوسرے ٹیسٹ میں نہیں کھلایا گیا تھا۔

شاہد آفریدی کے ریٹائر منٹ کے اعلان کو کرکٹ حلقوں میں خاصی سنجیدگی سے لیا گیا اور عمران خان سمیت اکثر ماہرین اور مبصرین کرکٹ نے اس فیصلے کو جلد بازی قرار دیا تھا جبکہ آئی سی سی کے صدر احسان مانی نے بہت زیادہ کرکٹ ہونے کے الزامات کے تناظر میں شاہد آفریدی کی مثال دیتے ہوئے کہا تھا کہ انہوں نے کرکٹ کی زیادتی کی شکایت کرتے ہوئے ٹیسٹ کرکٹ نہ کھیلنے کا فیصلہ کیا ہے اور آئرلینڈ کی طرف سے کرکٹ کھیلنے برطانیہ جارہے ہیں۔

دوسری جانب پاکستان کرکٹ بورڈ کی بھی یہی خواہش تھی کہ شاہد اپنا فیصلہ تبدیل کر دیں اور انہیں منانے کی کوششیں ہو رہی تھیں آخر کار ان کوششوں میں کامیابی ہوئی اور آفریدی نے اپنا فیصلہ واپس لے لیا۔