ریحانہ بستی والا

	دوسرے دن انڈیا نے پاکستان پر دو ایک سے برتری حاصل کرلی

کھیل کے دوسرے دن ڈبلز میں انڈیا کے کپتان لیئنڈر پیئس اور مہیش بھوپتی کی جوڑی تھی جبکہ پاکستان کی جانب سے عاصم شفیق اور جلیل خان میدان میں اترے۔ ڈیڑھ گھنٹہ چلنے والے اس کھیل میں نوجوان عاصم شفیق نے شاندار سروس کی اور ان کا بیک بھی اچھا تھا لیکن تیسرے راؤنڈ میں دونوں پاکستانی کھلاڑیوں نے انڈیا کے تجربہ کار کھلاڑیوں کے سامنے ہمت ہار دی۔

اسلام آباد کے پچیس سالہ عاصم شفیق اور جلیل خان پہلی مرتبہ ڈیوس کپ ڈبلز کھیل رہے تھے اور یہ میدان ان کے لیئے نیا تھا جبکہ ان کے سامنے لیئنڈر اور بھوپتی کافی تجربہ کار تھے اور انہوں نے ایک ساتھ گرینڈ سلیم میں سولہ ڈبلز اور ڈیوس کپ میں اٹھارہ میچ کھیلے ہیں۔

ڈیوس کپ کی شروعات جمعہ سات اپریل سے ہوئی۔ پاکستان نے کھیل کا شاندار آغاز کیا۔ پہلے کھیل میں پاکستان کے مانے ہوئے معروف کھلاڑی اعصام الحق کا سامنا انڈیا کے روہن بوپنا سے تھا۔ اعصام الحق کا کھیل روہن کے مقابلہ میں کافی اچھا رہا اور انہوں نے روہن کو سات چھ، چھ چار اور چھ چار سے شکست دے دی۔

ڈھائی گھنٹہ کا یہ کھیل شائقین کے لیئے دلچسپ تھا کیونکہ پہلے سیٹ میں مقابلہ تقریبا برابر کا تھا لیکن دوسرے اور تیسرے سیٹ میں روہن ، قریشی کے جارحانہ انداز کا جواب نہیں دے سکے۔

پاکستان سے اعصام الحق کے اہل خانہ ان کی ہمت افزائی کے لیئے موجود تھے اور ان کے ہر شاٹس پر تالیاں بھی بجا رہے تھے۔

اسی روز پرکاش امرت راج نے پاکستان کے عقیل خان کو سات چھ، سات چھ اور چھ چار سے شکست دی۔ امرت راج کے بیٹے پرکاش حالانکہ منجھے ہوئے کھلاڑی ہیں لیکن دونوں سیٹوں میں عقیل نے مقابلہ سخت رکھا، البتہ تیسرے راؤنڈ میں انہوں نے ہمت ہار دی۔

اتوار کے روز انڈیا کے کپتان لئینڈر پیئس کے سنگلز میں اترنے کے امکانات ہیں۔