عبدالرشید شکور بی بی سی اردو ڈاٹ کام، کینڈی

	مرلی دھرن کے ایکشن پر معترض امپائر ڈیرل ہیئر

چند روز قبل جب آئی سی سی نے یہ خبر جاری کی تھی کہ آسٹریلوی امپائرز ڈیرل ہیئر اور ڈیرل ہارپر پاکستان اور سری لنکا کے درمیان کینڈی میں ہونے والے ٹیسٹ کے امپائرز ہوں گے تو اسے بڑی دلچسپی سے پڑھاگیا تھا کیونکہ ڈیرل ہیئر ہی وہ امپائر تھے جنہوں نے سب سے پہلے مرلی دھرن کے بولنگ ایکشن پر اعتراض کرتے ہوئے1995ء کے میلبورن ٹیسٹ میں ان کی گیند کو نو بال قرار دیا تھا۔

اس کے بعد بین الاقوامی کرکٹ ایک بڑے قضیئے سے دوچار ہوگئی تھی لہذا سب کو اس بات کا شدت سے انتظار تھا کہ مرلی دھرن کے ہوم گراؤنڈ کینڈی میں ڈیرل ہیئر کا سری لنکن آف اسپنر سے کس طرح سامنا رہتا ہے۔

ہفتے کو سری لنکن کرکٹ بورڈ کے چیف ایگزیکٹیو دلیپ مینڈس نے اس بات کی تصدیق کی ہے کہ ڈیرل ہیئر کینڈی ٹیسٹ کے امپائر نہیں ہیں لیکن وہ یہ ماننے کے لیئے تیار نہیں کہ ہیئر کو تبدیل کردیا گیا ہے بلکہ ان کا دعوٰی ہے کہ آئی سی سی نے کینڈی ٹیسٹ کے لیئے جن امپائرز کے نام بھیجے ہیں وہ ہارپر اور ڈیوس ہیں۔

	ہیئر کبھی بھی سری لنکن ٹیم اور شائقین کے لیئے پسندیدہ نہیں رہے

یاد رہے کہ کینڈی میں ڈیرل ہیئر کے امپائر مقرر کئے جانے کی خبر سری لنکا میڈیا نےشہ سرخیوں کے ساتھ شائع کی تھی۔ عام خیال یہ ہے کہ سری لنکا میں شدید ردعمل کے پیشِ نظر ڈیرل ہیئر نے ہی سری لنکا نہ آنے کا فیصلہ کیا ہے کیونکہ یہ بات کسی سے ڈھکی چھپی نہیں کہ مرلی کے بولنگ ایکشن پر اعتراص کرنے اور اپنی کتاب میں اس واقعے کا تذکرہ کرنے کے بعد ہیئر کبھی بھی سری لنکن ٹیم اور شائقین کے لیئے پسندیدہ نہیں رہے۔

یہ بھی ممکن ہے کہ سری لنکن کرکٹ بورڈ نے ڈیرل ہیئر کی تعیناتی پر اعتراض کیا ہو تاہم سری لنکن کرکٹ بورڈ کے ڈائریکٹر کرکٹ آپریشنز بنڈولا ورنا پورا نے اس کی تردید کی ہے۔

دلچسپ بات یہ ہے کہ دلیپ مینڈس اس امر سے انکار کر رہے ہیں کہ ہیئر کینڈی ٹیسٹ کے امپائر تھے حالانکہ سری لنکن کرکٹ بورڈ کی جاری کردہ سیریز کی تفصیلات میں ہیئر کا نام امپائرز پینل میں موجود ہے اور اطلاعات کے مطابق سری لنکن کرکٹ بورڈ نے ڈیرل ہیئر کے لیئے سکیورٹی کے خصوصی انتظامات بھی کر رکھے تھے۔