ظاہر ہے کہ یہ میرے لیے بہت ہی قابل فخر بات ہے: شین وارن

چھتیس سالہ وارن نے یہ نیا ریکارڈ جنوبی افریقہ کے خلاف کھیلے جانے والے پہلے ٹیسٹ میچ میں قائم کیا ہے۔ اس سے قبل آسٹریلیا ہی کے ڈینس للی نے 1981 میں ایک برس کے دوران پچاسی وکٹیں لینے کا ریکارڈ قائم کیا تھا۔

شین وارن کا کہنا ہے ’ظاہر ہے کہ یہ میرے لیے بہت ہی قابل فخر بات ہے‘۔

ان کا کہنا تھا کہ’میں نے زندگی میں بین الاقوامی کرکٹ کے 15 عجیب و غریب موسم دیکھے ہیں اور میرے لیے زندگی کے اس مرحلے پر کرکٹ کا یہ بہترین دور ہے۔ اس سے کرکٹ کے میدان میں اپنے مستقبل کے بارے میں میں مزید پر امید ہو گیا ہوں‘۔

شین وارن نے چھیاسیویں وکٹ اس وقت حاصل کی جب انہوں نے ایشول پرنس کو ایل بی ڈبلیو کیا۔

دلچسپ بات یہ ہے کہ اس میچ کے دوران ڈینس للی بھی مجمع میں موجود تھے۔ ان کا کہنا تھا ’ریکارڈ تو ہوتے ہی ٹوٹنے کے لیے ہیں اور آپ یہی امید کرتے ہیں کہ نیا ریکارڈ قائم کرنے والا شخص کوئی ایسا شخص ہو آپ جسے اس میدان میں بہت کامیاب تسلیم کرتے ہوں۔ میں وارن کو دنیا کا بہترین باؤلر سمجھتا ہوں‘۔

انہوں نے مزید کہا ’وہ جب بھی بال کرواتے ہیں تو لگتا ہے کہ جیسے اب وکٹ گرنے کا وقت آگیا ہے۔ اور میرے خیال سے اس سے میچ میں دلچسپی میں بہت اضافہ ہوتا ہے‘۔

للی نے اپنا ریکارڈ 1981 میں تیرہ ٹیسٹ میچ کھیل کر قائم کیا تھا جو بالترتیب بھارت، انگلینڈ، پاکستان اور ویسٹ انڈیز کے خلاف تھے جبکہ شین وارن نے 87 وکٹیں چودہ ٹیسٹ میچوں کے دوران حاصل کی ہیں۔