مناء رانا بی بی سی اردو ڈاٹ کام، لاہور

	شعیب اختر کی آہستہ گیند انگلش بلے بازوں کی سمجھ میں نہ آسکی

انہوں نے کہا کہ اگرچہ پاکستان کی پوری ٹیم ہم سے بہتر کھیلی مگر شعیب نے لاہور ٹیسٹ میچ میں پاکستان کی فتح میں سب سے اہم کردار ادا کیا۔

انہوں نے کہا کہ ایسی سیدھی وکٹ پر ایک فاسٹ بالر کا اتنی زبردست بالنگ کرنا ایک حیران کن بات ہے اور اس میچ میں شعیب نے ہمیں حیرت میں ڈال دیا۔

مائيکل وان نے تسلیم کیا کہ ’جب بھی شعیب اختر بالنگ کروانے کے لیے بال ہاتھ میں لیتے تو ہمارے کھلاڑی اسے ایک خطرہ سمجھنے لگتے‘۔ مائیکل وان نے کہا کہ نہ صرف شعیب اختر نے بلکہ پاکستان کے تمام بالرز نے بہت زبردست اور منظم طریقے سے بالنگ کروائی۔

	مائیکل وان خود بھی شعیب اختر کی گیند پر آوٹ ہوئے

مائیکل وان نے اپنی پریس کانفرنس میں پوچھے جانے والے متعدد سوالوں کے جواب میں شعیب کی بالنگ کا ذکر کیا۔ انہوں نے خاص طور پر شعیب کی ان آہستہ پھینکی جانے والی گیندوں کا ذکر کیا جنہیں انگلینڈ کے بلے باز سمجھ ہی نہ سکے۔

خود مائیکل وان بھی میچ کے چوتھے دن شعیب کی اسی آہستہ گیند کا شکار ہو کر صرف تیرہ کے سکور پر پویلین واپس لوٹ گئے تھے۔

سیریز میں انگلینڈ ٹیم کی دو صفر سے شکست کی ایک اور اہم وجہ مائیکل وان کے نزدیک انضمام کی زبردست فارم تھی۔ انگلینڈ ٹیم کے کپتان نے کہا کہ تمام سیریز میں انضمام نے مسلسل بہتر کارکردگی دکھائی اور اس نے بھی پاکستان کی جیت میں اہم کردار ادا کیا۔

مائیکل وان نے یہ بھی تسلیم کیا کہ پاکستانی کھلاڑی انگلش کھلاڑیوں سے بہتر ہیں اور انہوں نے تمام سیریز میں ان سے بہتر کھیل پیش کیا۔

جب بھی شعیب اختر بالنگ کروانے کے لیے بال ہاتھ میں لیتے تو ہمارے کھلاڑی اسے ایک خطرہ سمجھنے لگتے مائیکل وان

پانچ ایک روزہ میچوں کی سیریز کے سلسلے میں وان کا کہنا تھا کہ ہم اس میں بہتر کھیل کا مظاہرہ کریں گے کیونکہ ایک روزہ میچ ٹیسٹ کرکٹ سے مختلف ہوتے ہیں۔

ان کا کہنا تھا کہ’ اب ہماری کوشش ہوگی کہ ہم پانچ ایک روزہ میچوں کے لیے خود کو منظم کریں اور اپنی کمزوریوں پر کام کر کے ایک روزہ میچز میں اچھی کارکردگی دکھائیں اور پاکستان کی وکٹوں پر کھیل کر وہ سیکھیں جو ہمیں بھارت میں بھارت کے خلاف ہونے والی ہماری سیریز میں مدد دے کیونکہ بھارت میں وکٹیں بھی ایسی ہی ہوں گی‘۔