عبدالرشید شکور بی بی سی اردو ڈاٹ کام، راولپنڈی

	انضمام الحق ایک خاتون کی عیادت کر رہے ہیں۔

ادھر پاکستانی کرکٹ ٹیم کے کپتان انضمام الحق نے کہا ہے کہ ان کی ٹیم انگلینڈ کے خلاف پہلے ٹیسٹ کے بعد زلزلے سے متاثرہ علاقوں کا دورہ کرے گی۔

کپتان مائیکل وان اور نائب کپتان مارکس ٹریسکوتھک معمول کی نیٹ پریکٹس کے بعد ہیلی کاپٹر کے ذریعے ضلع باغ گئے۔ ان کے ساتھ کچھ امدادی سامان بھی تھا جس میں کھانے پینے کی اشیاء ادویات اور کمبل تھے۔

پاکستانی ٹیم کے کپتان انضمام الحق نےاتوار کی صبح اپنی ٹیم کے دوسرے ارکان کے ساتھ اسلام آباد اور راولپنڈی کے ہسپتالوں کا دورہ کیا جہاں ٹیم نے زلزلے سے متاثرہ افراد خصوصاً زخمی بچوں کی عیادت کی۔

کپتان انضمام الحق نے اس موقع پر صحافیوں سے بات کرتے ہوئے کہا کہ پاکستانی ٹیم اس سانحے میں پوری قوم کی طرح زلزلے سے متاثرہ افراد کے ساتھ ہے۔انہوں نے کہا کہ پاکستانی ٹیم انگلینڈ کے خلاف پہلے ٹیسٹ کے بعد زلزلے سے متاثرہ علاقوں کا دورہ کرے گی۔

انضمام نے یہ بھی بتایا کہ پاکستانی ٹیم ملتان ٹیسٹ کی تمام آمدنی زلزلے سے متاثرہ افراد کی امداد کے لئے دے گی۔

اس موقع پر زلزلے سے متاثرہ بچے پاکستان کی کرکٹ ٹیم کے ارکان کو اپنے درمیان پا کر انتہائی خوش دکھائی دیے۔

اس سے قبل انگلینڈ کی ٹیم کے کپتان مائیکل وان جمعہ کو اپنے ساتھی کرکٹرز ٹریسکوتھک، ہوگرڈ اور جائلز کے ہمراہ اسلام آباد میں پاکستان انسٹی ٹیوٹ آف میڈیکل سائنسز بھی گئے تھے جہاں انہوں نے زلزلے کے زخمی بچوں کی عیادت کی تھی۔

انگلینڈ کی ٹیم کے کوچ ڈنکن فلیچر کا کہنا ہے کہ انگلینڈ کرکٹ بورڈ زلزلہ زدگان کے فنڈ میں تقریبا ایک لاکھ پاؤنڈ تک کی امداد دے گا۔

انگلش کرکٹرز چار دسمبر کو لاہور میں ایک نمائشی گالف ٹورنامنٹ میں بھی حصہ لیں گے جس کی آمدنی امدادی فنڈ میں جائے گی۔

	پاکستانی ٹیم کے کوچ باب وولمر بھی ٹیم کے ہمراہ تھے