 |  سٹراس کی ہیلمٹ پر گیند لگنے سے ان کے کان سے خون جاری ہو گیا |
ایشز سیریز کے تیسرے ٹیسٹ کے آخری دن آسٹریلیا کو میچ جیتنے کے لیے 399 رن بنانے ہیں۔ چوتھے دن جب کھیل ختم ہوا تو آسٹریلوی ٹیم نے بنا کسی نقصان کے 24 رن بنائے تھے۔ اس سے قبل انگلینڈ نے مجموعی طور پر چار سو تیئس رن کی برتری حاصل کر کے اپنی اننگز ختم کرنے کا اعلان کر دیا تھا۔ انگلینڈ کی ٹیم نے دوسری اننگز میں دو سو اسی رن بنائے اور اس کے چھ کھلاڑی آؤٹ ہوئے۔ چوتھے دن کی صبح آسٹریلیا کی ٹیم اپنی پہلی اننگز میں صرف تین سو دو رن بنا کر آؤٹ ہو گئی تھی۔ انگلینڈ کے کھلاڑی اینڈریو سٹراس نے دوسری اننگز میں ایک سو چھ رن بنائے جبکہ این بیل نے دوسری اننگز میں بھی نصف سنچری بناتے ہوئے پینسٹھ رن بنائے۔ سٹراس اپنی اننگز کے دوران آسٹریلوی بالر بریٹ لی کی ایک گیند ہیلمٹ پر لگ جانے سے زخمی بھی ہوگئے تھے۔ بریٹ لی کی ایک اوپر اٹھتی ہوئی گیند سٹراس کی ہیلمٹ پر لگی جس سے ان کے کان پر زخم آیا اور خون بہنے لگا۔ انگلینڈ کی دوسری اننگز میں آسٹریلوی بالروں کو بہت محنت کرنی پڑی۔ شین وارن جو ٹیسٹ میچوں میں چھ سو وکٹیں حاصل کر چکے ہیں دوسری اننگز میں کوئی وکٹ حاصل نہ کر سکے۔ اس اننگز میں میگرا سب سے کامیاب بالر رہے انہوں نے پانچ وکٹ حاصل کیں۔ آسٹریلیا کی پہلی اننگز میں شین وارن نے شاندار بلے بازی کی اور نوے رن بنا کر آؤٹ ہوئے۔ ان کی شاندار بلے بازی کی بدولت آسٹریلیا کی ٹیم فالو آن بچانے میں کامیاب ہو گئی۔ انگلینڈ کی طرف سے ایس پی جانز نے اچھی بالنگ کا مظاہرہ کیا اور چھ کھلاڑیوں کو آؤٹ کیا۔ انہوں نے سترہ اوور میں صرف ترپّن رن دیے۔ انگلینڈ کے سپنر ایشلے جائلز نے تین وکٹیں حاصل کیں۔ آسٹریلوی ٹیم: جسٹن لینگر، میتھیو ہیڈن، رکی پونٹنگ، ڈیمیئن مارٹن، مائیکل کلارک، سائمن کیٹچ، ایڈم گلکرسٹ، شین وان، بریٹ لی، جیسن گلپسی اور میگرا۔ انگلینڈ ٹیم: مارکس ٹریسکوتھک، اینڈریو سٹراس، مایئکل وان، ایئن بیل، کیون پیٹرسن، اینڈریو فلنٹاف، گیرئنٹ جونز، ایشلے جائلز، میتھیو ہوگارڈ، سٹیو ہارمیسن، اور سائمن جونز۔ | 
یہ صفحہ دوست کو ای میل کیجیئے
پرِنٹ کریں
