 |  پیٹرسن کا انتخاب تھارپ کے کرکٹ کیرئیر کا اختتام سمجھا جارہا ہے |
نوجوان برطانوی بلے باز کیون پیٹرسن کو ایشز سیریز کے لیے ٹیم میں شامل کر لیا گیا ہے۔ ان کا انتخاب تجربے کار بلے باز گراہم تھارپ کی جگہ عمل میں آیا ہے۔ برطانوی سلیکشن کمیٹی کے سربراہ ڈیوڈ گریونی کا کہنا تھا کہ ’ تھارپ اور پیٹرسن میں سے ایک کا انتخاب ان کے لیے اب تک کیے جانے والے فیصلوں میں سے سب سے مشکل تھا‘۔ کیون پیٹرسن کے انتخاب کی وجہ ان کی بہترین فارم اور جوش و جذبہ بنا۔ پیٹرسن نے حالیہ نیٹ ویسٹ ون ڈے سیریز میں شاندار کارکردگی کا مظاہرہ کرتے ہوئے آسٹریلیا کے خلاف دو نصف سنچریاں بنائی تھیں۔ ڈیوڈ گریونی نے کہا کہ ’ ہمیں کوئی شک نہیں کہ وہ اپنی ون ڈے فارم کو ٹیسٹ میچوں میں بھی برقرار رکھیں گے۔ ہمیں یقین ہے کہ ان میں ایک بڑا کھلاڑی بننے کی تمام خصوصیات موجود ہیں اور وہ ایک میچ ونر کھلاڑی ہیں‘۔ ایشز سیریز کے لیے پیٹرسن کا انتخاب گراہم تھارپ کے کرکٹ کیرئر کا اختتام سمجھا جارہا ہے۔ برطانیہ کی جانب سے 1993 میں آسٹریلیا کے خلاف اپنے کیرئر کا آغاز کرنے والے اور اب تک سو ٹیسٹ میچوں کے تجربے کے حامل گراہم تھارپ آج کل فارم میں نہیں ہیں اور وہ ماضی قریب میں زخمی بھی ہو چکے ہیں۔ ہمپشائر کاؤنٹی کے بولر کرس ٹرملٹ بھی بارہ رکنی سکواڈ میں شامل ہیں تاہم میچ کھیلنے کے لیے ان کا انتخاب اسی صورت میں ہو گا جب برطانیہ کے صفِ اول کے تین بالروں میں سے کوئی زخمی ہو جائے۔ میتھیو ہوگرڈ کواگرچہ حالیہ ون ڈے سیریز کے لیے برطانوی ٹیم میں شامل نہیں کیا گیا تھا لیکن وہ حسبِ سابق ٹیسٹ میچوں میں انگلینڈ کے لیے بالنگ کا آغاز کریں گے۔ بلے باز این بیل بھی ٹیم میں اپنی جگہ برقرار رکھنے میں کامیاب رہے ہیں۔ بیل مارک بوچر کی جگہ ٹیم میں شامل کیے گئے ہیں جو کلائی میں تکلیف کے سبب نہیں کھیل رہے ہیں۔ این بیل نے بنگلہ دیش کے خلاف سیریز میں شاندار بلے بازی کا مظاہرہ کیا تھا۔ | 
یہ صفحہ دوست کو ای میل کیجیئے
پرِنٹ کریں
